فتاة تشكو: «تعليمي على قدي وخطيبي أحرجني.. أعمل إيه؟!»

كتبت فتاة منشورًا على موقع التواصل الاجتماعي "فيس بوك" تشكو من مشكلتها مع خطيبها، والتي ترجع لاختلاف المستوى الثقافي والتعليمي بينهما، ووجدت الفتاة دعما كبيرا من رواد السوشيال ميديا.

وقالت الفتاة في منشورها: "بنات معلش أنا اتحطيت في موقف وحش جدا، أنا تعليمي على قدي شوية، وخطيبي سألني سؤال محرج قالي أنتي بتحبي المجال الأدبي ولا العلوم وأنا بصراحه معرفتش أرد ممكن تعرفوني تعريفهم ولما يسألني تاني أرد أقول إيه؟».

وعلقت آية: «قوليه بحب الأدبي وبحب اقرأ في الكتب في الدين لمصطفى محمود وهاتيلك كام كتاب اتسلى فيهم سهلة، واوعى تبينى إنك قليلة أو مش واثقة من نفسك جدتنا كلنا مكنوش متعلمين، زى فاطمة كشرى كده بس كان فيهم حنية الدنيا عن أهلنا إلى معاهم أعلى الشهادات، عمره ما كان بالشهادات وأنا طبيبة وبقولك الكلام ده عن خبرة في الحياة».

وقالت شيماء: «معلش سؤال إنتي عندك كام سنة، في سن كام في دراسة، هقولك الرد المناسب لو عايزها رد عام الأدبي يعني شخص بيحب يقرأ عندو معلومات كتير علمي عباره عن تجارب كل حاجه بيحب يعملها عملي مش بيحب يحفظ زي ما بظبط في ابتدائي لم كنا بندخل المعمل نعمل معادله عملي».

كما علقت شيري: "ده ع حسب مجال دراستك بس الإجابة عموما إن الأدبي كثير الاطلاع والقراءة زي مثلا الفلسفة وغيرها أما العلمي هو التجارب يعني بيرجع كل حاجه للتجربة العملية أولا».

وعلقت مريم: «متتحرجيش عادي والأهم من إنك تقوليلو إجابه ثقفي نفسك يعني افتحي جوجل واكتبي الفرق بينهم واعرفي واقري في جميع المجالات كل ما تلاقي مقال عن أي حاجة اقريه متعديش حاجه اقري في الأدب والعلوم الكيمياء الطب والاقتصاد كله».