زوجة تطلب الخلع ونفقة للأولاد لأسباب صادمة
نهى أباظة تكتب: وأتاري العقرب مش في الساعة
الخميس 06/يناير/2022 - 05:35 م
وأتاري الساعه مش بتلف.. وأتاري العقل بيكبر ويخف.. وقماش مستورد أشوفه بيهف.. كان بيغطي طلع بيشف.. وأتاري العقرب مش في الساعة.. والناس بياعه.. وفي كل دقيقة أو ثانية سيرتي في إذاعة.. لبست بدلة.. لبست الساعة.. الكل اتغير.. لما عرفوا إني الشماعة.. وأتاري العقرب مش في الساعة..
وأنا يومي فيه كام ساعة... عشان أشوفها كام..
تلف ما تلفش... أنا لافف مابقتش خام..
من ساعتي قايم نايم... على وشها غطسان عايم... مش لاقي كلام..
ساعة فيها بدادى واتحايل... وساعه أزعل على غيري وأجامل..
وساعه فيه مطيور... اتهور فيها... ومغرور..
وساعة فيها أزعل على حالي... وساعة أحس إن أنا غالي... ساعة طاير فيها من الفرحة... وساعة أعد ليالي..
وأتاري العقرب مش في الساعة
وأتارى الساعة براند... ما أنا أصلي ساعاتي.. ساعة فيها راكز مظبوط.. وساعة ضايع وفلاتي..
زودتها نص ولا لفت... وضاع نص العمر..
أخرتها ربع ولا كفت... مش فاهم بحفظ وبصم..
مش فاكر فيها غير ساعة.. اللي اشترى باع... واللي رماها..
وأنا عايش كده في النص... مستني العقرب يقرص..
وأتاري العقرب مش في الساعة
وأتاري الساعة استيكها ليف.. وأنا مخي خفيف... تضحك عليا بنص رغيف..
ما بخدش فيها ولا راحة والراحة حرارة.. شغال بدماغي وريموت وشوية حجارة... ساعة مكسب لوحتي مفيش والتانية خسارة... عيني خضرة زرقة تقول لينسيز... طلعت صورتي لابس نضارة..
وأتارى العقرب مش في الساعة
ساعه وممكن أبقى عجينة... بس مش لازم أكون معجون..
ومحدش يشحني فيها... أنا مولود كده كده مشحون..
طب ثانية أشوف حد مضمون.. وما احسش إني مديون..
وساعة بلاستيك وساعة حديد.. يطلعلك عقرب ويكيد..
وأتاري العقرب مش في الساعة
وأتاري الساعة.. مش أد الإيد.. والساقط فيها مش بيعيد...
تخلص ومفيش..
دقيقه أيوه ماتكفيش.. بس أعيش.. مع عقربها يروح مايجيش.. وأتاري العقرب مش في الساعة.
