مقالات

الدكتورة رانيا يحيى تكتب: مستعجلين على الجواز ليه؟!

السبت 27/مارس/2021 - 06:25 م

ارشيفية

يا ناس متجوزوش بناتكم بدرى، سيبوهم يعيشوا طفولتهم، ينطلقوا يجروا ويفرحوا ويلعبوا، وكمان ياخدوا فرصتهم فى التعليم وفى الشغل، مستعجلين علشان تشيلوهم الهم بدري ليه؟؟ هنفضل لغاية امتى نشوف البنت انها مجرد كائن اتخلق علشان يتجوز ويخلف بس؟؟ طبعا دا مش معناه إننا بنستنكر هذا الدور!! حاشى وكلا!!

دى مسئولية عظيمة ربنا أوكلها للست علشان تبقى دايما الحضن والدفا اللى يقيم البيت، وزرع جواها حنان وعطاء لأغلى ما فى حياتها ضناها، لكن المشكلة الكبيرة إن بناتنا اللى بيتجوزوا قبل السن القانونية يا إما بيسننوهم علشان يتحايلوا على القانون أو بيجوزوهم بشكل عرفي سواء بكلمة بين رجالتها بالاتفاق مع المحروس العريس اللى فى كتير جدا من الأحيان للأسف مش بيكون راجل فى اتفاقاته ومع أول مشكلة بيسيبها ويمشى، بس الخطورة مش فى إنها لا منها متجوزة ولا مطلقة الأصعب إن ممكن يكون عندها أطفال والست تبقى مش عارفة تنسبهم لأبوهم اللى مشى وكمان مفيش ورق يثبت الجوازة من أساسها!! مين بأة اللى بيتحمل المسئولية دى كلها ويشيل تبعات الجريمة اللى بتحصل دى؟؟.

للأسف بتكون الطفلة اللى حملوها فوق طاقة البشر ودمروا لها حياتها ولا اتعلمت كويس ولا خدت فرصتها فى إنها تشتغل، وتفضل تجرى على حياة مش عارفة لها أول من آخر، وتعيش مأساة هى وولادها الله أعلم تكون نهايتها إيه!! بس الأكيد إنها حياة مشردة لها ولأطفالها وكمان لأسرتها اللى بيلاقوها ضحية بس بعد إيه!! ويقولوا يا ريت اللى جرى ما كان!!! وعلشان كدا سيادة الريس طلب من البرلمان تقديم مشروع قانون منفصل يجرم الزواج المبكر لإنه أب لكل المصريين وخايف على حياة بناته ومستقبل ولادهم اللى فى خطر.

________________________

عضو المجلس القومي للمرأة

________________________

الأخبار