رضوى الشربيني: صوتك العالي "عدم أنوثة وقلة أدب"

قالت الإعلامية رضوى الشربيني، إن على السيدة قبل أن تحاسب الرجل طول الوقت وتظهر في شكل الست المظلومة أن تضبط نفسها وتحسن من طريقتها في التعامل مع زوجها، مشيرةً إلى أن الفتاة أو الزوجة إذا استخدمت الصوت العالي في النقاش، فإن ذلك يدل على عدم أنوثة المرأة، أو أن أهلها لم يحسنوا تربيتها فأصبحت ناقصة التربية والأخلاق.

واستكملت، «اتعلمي تحترميه قبل لما تحبيه يعني عوجة الفم وصوتك العالي ورفعة الحاجب وقفلان المكالمة الهاتفية في وشه دليل على عدم تربيك أو انعدام أنوثتك».

وأضافت رضوى الشربيني خلال تقديمها برنامج "هي وبس" المذاع على فضائية "سي بي سي سفرة"، «ولا بالفلوس ولا عدد الشنط اللي بتلبسيها أو الملابس البراند، أو العربيات آخر موديل اللي بتركبيها أو عدد الرجالة المعجبين بيكي؛ ده مش هيعلي من قيمتك قدام حبيبك أو خطيبك لكن القيمة الخاصة بيكي تكون من عقلك وشغلك وأدبك واحترامك واهتمامك بيه، ونظافتك الشخصية وشكلك الحلو، وسؤالك عنه، واحترام خصوصياته وشغله ومواهبه، ومساندته في كل الأوقات وخصوصا في الأوقات اللي يحتاجك فيها».

واستطردت: «وهو مش مصباح علاء الدين علشان ينفذلك كل طلباتك واللى بتحلمي بيه، اطلبي على قد قدره وإمكانياته بلاش تعجزيه».

واختتمت: «الكلام الحلو ياجماعة ياستات، يعني زي لما إحنا بنحب الكلام الحلو والغزل الراجل برضوا بيحب الكلام الحلو والمدح في كل حاجه فيه، ده بيحنن القلب ويزود الحب، واتعلمي تفوتي وتعدي مش لازم تقفي على كل حاجه ومينفعش كل يوم تعملي خناقة، وخير الأمور الوسط لأن سيدنا علي رضي الله عنه قال " لاتكن لينا فتعصر ولا تكن قاسيا فتكسر».