صرح محمد المهندس، ابن الراحل فؤاد المهندس خلال حديثة مع سهير جودة ومفيدة شيحة : "والدي عرف بوفاة عبد المنعم مدبولي من عادل إمام بعد زيارته له، حينها بكى وبدأت حالة البكاء والخوف تسيطر عليه فترة الثمانينات مع وفاة بهجت قمر".

وذكر في برنامج "الستات" والمذاع على قناة "النهار" أن عادل إمام، كان دائم الاتصال بفؤاد المهندس ولو معرفش يوصل له كان يتصل بيا ويقولي أبوك فين وحالته عاملة إزاي؟ طيب أنا عايز أسمع صوته".

وأضاف: "فؤاد المهندس كان فرحان جدا بنجاح عادل إمام، لدرجة أن في فيلم 5 باب لما عادل إمام جه لوالدي علشان يشتغل معاه الفيلم  فرح والدي بالدور  اللي عرضه عليه الزعيم، فكان ما بينهم حالة حب  واحترام  وذكر آخر مرة شوفت عادل إمام من 4 سنوات في وفاة سامي العدل قال للناس ده ابن الأستاذ اللي عملني التمثيل ابن استاذي ومعلمي فربنا يشفيه لأنه كان دائم الاتصال بنا".

علاقة فؤاد المهندس بشويكار

أوضح محمد المهندس، أن والده أحب الفنانة شويكار قائلا: "هي عرفت إزاي تجيبه ويعجب بيها وهو حب فيها دلعها ورقتها وحس إن فؤاد المهندس مع شويكار هيعمل حاجات كتير حلوة في الشغل فجمعهما كيميا فاتجوزوا واتفقوا انهم ميخلفوش علشان هو كان مخلف وهي كمان، ولكن بعد زواج والدي من شويكار أمي طلبت الطلاق ورفضت تتجوز بعده".

وأردف بالنسبة للمعجبات: "فؤاد المهندس كان كاريزما وستات كتير كانت بتحبه وهو كان يعرف يقرأ الست من مخها وبتفكر إزاي والتقل بتاعه والرزانة كان بيحبب الست فيه".