كشفت المخرجة إيناس الدغيدي تفاصيل مشادة كلامية حدثت بينها وبين النجم الراحل أحمد زكي، وذلك خلال لقائها ببرنامج "أسرار النجوم" على محطة راديو نجوم إف إم ، من تقديم إنجي علي.

وروت الفنانة تفاصيل المشادة الكلامية بينها وبين أحمد ذكي قائلة ً "لما اتخانقت في مرة مع الفنان الراحل أحمد زكي في فيلم من أفلامنا، وهو وقتها تعامل بروح النجومية، قولتله أنت تعمل لقطة النجومية دي مع الأولاد اللي بيقولوا اسمك في الشارع لكن هنا جوا البلاتوه أنت مش نجم ولكن زيك زي العامل اللي بيشيل الكاميرا وتسمع كلام المخرج".

واسترسلت حديثها "لأنك لو مش هتسمع كلامي، كل دول مش هيدوا اعتبار للمخرج، وللأسف القيم دلوقتي اختلفت تماما، النجم طبعا هيفضل نجم ولكن قصة إن النجم يكون أعلى من المخرج ضيعت هيبة السينما، والمخرج نفسه بيضيع هيبته لو قبل بالوضع دا، وأنا شخصيا كنت بختار النجوم ومفيش نجم اختارني، والنجم بيسمع الكلام طالما بتديه قيمته".

وعن أزمة المخرجين حاليا مع النجوم قالت:قيمة الفيلم اتنقلت من المخرج للنجم، زمان كان المخرج أساس الفيلم يجي هو  ويختار النجم، ولكن الآن المنتج يريد التوقيع مع النجم ثم يجي المخرج اللي هو هيقدر عليه هو والنجم، ومهنة المخرج مبقتش الأساسية في العمل الفني، وأنا كنت بشتغل مع آلهة في البلاتوه مثل صلاح أبوسيف وبركات ويوسف شاهين، ولكن دلوقتي الموضوع تغير تماما لأنك لو ضيعت هيبة المخرج فستكون ضيعت هيبة الفيلم".

اقرأ أيضًا..

فريال يوسف تكشف تفاصيل مرضها بالصرع.. وانفصالها عن زوجها

كذلك تطرقت المخرجة إيناس الدغيدي للحديث عن السبب وراء اتجاهها لإنتاج الأفلام فقالت "السينما عشان تعملي فيلم حاليا لازم تكوني مختلفة، لأن الدراما قتلت كل الموضوعات بصراحة واتكلمت في كل حاجة، السينما لازم يكون ليها خصوصية والأفكار فيها أجرأ "

وأضافت: "والمنتجين للأسف بيقولولي أنتي بتدخلي في الممنوع والمحظور ومعادش فيه منتجين عندهم الجرأة والشجاعة، وأنا أنتجت 8 أفلام من أعمالي بسبب النقطة دي لشعوري أن المنتجين مش هيرحبوا بأفكاري، وقدمتهم كمنتج منفذ وأبيع العمل للقنوات".