توك شو

زينة: «مش بحس إني ست قوية.. ومعنديش حاجه أديها لحد»

الجمعة 30/سبتمبر/2022 - 06:49 م

الفنانة زينة

بسمة خالد

حلّت الفنانة زينة ضيفة في البرنامج الإذاعي "أسرار النجوم" مع المذيعة إنجي علي، على محطة راديو "نجوم إف إم"، تحدثت من خلاله عن علاقتها بأولادها ودعم النجمة عبلة كامل لها في بدايتها الفنية.

علاقتها بأولادها

وقالت "زينة" عن قيمة الحب في حياتها وعلاقتها بأولادها: "قلبي بيدق على طول مع ولادي، ومفيش قصة حب في حياتي ومعنديش وقت ومعنديش حاجة أديها لحد، وهبقى بظلم أي حد لإني مش هديه حقه أو أي اهتمام والاهتمام رايح في حتة معينة".

وتابعت: "وابني سمع كلامي في الموضوع دا قبل كدا في أحد البرامج وقال لي إزاي بيتدخلوا في خصوصياتك وحياتك وقلت له عايزيني أتجوز وأكون مبسوطة، فرد عليّ وسألني هو أنت مش مبسوطة؟.. فقلت له مبسوطة أوي، فقال لي قوليلهم إنك مبسوطة معانا ومحدش يقول لك الكلام دا مرة تانية، وهو عنده حق طبعا".

طريقة تربيتها لأبنائها

وأوضحت "زينة" طريقتها الخاصة في تربية أبنائها قائلة: "أنا حريصة أعلم ولادي الرضا والطموح للنجاح ومش عايزاهم يدخلوا شيء ويخسروا ومهم يكون عندهم الإصرار على النجاح.. وأنا بكره الناس الحيادية لأن الحيادي ظالم، الحيادي شخص منافق خليك واضح وصريح، وإنتي لو ست معندكيش موقف فأنتي ست مش كويسة وظالمة، والراجل بردو بينطبق عليه نفس الكلام".

وأضافت: "مش بحس إني ست قوية، ولكن أنا جدعة مع نفسي وواضحة وصريحة ومش بكدب على نفسي أو أحط نفسي في موقف معرفش أعمله".

دعم عبلة كامل

وتحدثت عن دعم الفنانة عبلة كامل لها في بدايتها الفنية معبرةً: "مش هنسى الأستاذة عبلة كامل وهي وقفت جمبي كتير ولما كانت تشوفني بعيط كانت بتقف جمبي ومتسبنيش وكان دا في وقت تمثيلنا مسلسل عفاريت السيالة، لما حد كان يضايقني كانت تجيب لي حقي وكنت علطلول بجانبها في الغرفة".

اقرأ أيضًا..