كلام ستات

كيف تتعاملين مع الثانوية العامة؟.. إليكِ هذه النصائح

الإثنين 25/يوليه/2022 - 03:15 ص

بسمة خالد

الطلاب المقبلون على الثانوية العامة يكون لهم اهتمام أكثر من أي فئة عمرية أخرى بالتعليم، خاصةً أن بها يتحدد ملامح المستقبل، وفي هذا التقرير يستعرض «هير نيوز» آراء الفتيات في كيفية التعامل مع هذه السنة الصعبة.

وجهت إحدى الفتيات سؤالا لمعرفة آراء الفتيات في كيفية التعامل مع هذه السنة، قائلةً: "نصايحكو يا حلوين للي داخلين ٣ ثانوي؟".

وتعددت آراء الفتيات في ذلك فقالت إحداهن: "متراكميش عليكي حاجة وذاكري أول بأول وقربي من ربنا هتحسي براحة نفسية وهتحسي إنك عاملة اللي عليكي وضميرك مرتاح وراضية بالنتيجة مهما كانت إيه، وابعدي عن الناس السلبية واهتمي بأكلك وبصحتك الجسمية والنفسية أهم حاجة، وهي سنة عادية جدًا زي أي سنة، متخليش الكلام السلبي يأثر عليكي بس صدقيني مش هتحسي بيها وهتعدي بسرعة وإنتي قدها وربنا يفرحك وتحققي اللي نفسك فيه".

وقالت أخرى: "علاقتك بربنا أهم حاجة، وصلي دائما عشان دي أكتر حاجة هتريحك، اظبطي نومك وجدولك باليوم صحتك ونفسيتك أهم حاجة، اعملي اللي عليكي وتأكدي إن ربنا مش هيسيبك أبدا، ربنا معاكي".

وعلقت أخرى: "متراكميش واوعي تسيبي حاجه لفتره المراجعة أو ليلة الامتحان، الدروس يا كلها أونلاين يا كلها سنتر أو أغلب المواد أونلاين عشان هتسيبي الاونلاين وتركزي في السنتر، ظبطي نومك ومتاخديهاش جد أوي من أول السنه ولا تريحي أوي المعقول حلو في كل حاجة".

وكتبت فتاة: "اللغات متهمليهاش في أول السنة عشان هتندمي وتحسي إنك متأخره في الآخر، وكمان حاولي بقدر الإمكان تحافظي على نفسيتك بصراحة كنت بحاول بس الموضوع كان صعب بس حاولي، وخليكي دايما تبعدي أي حاجة تشتتك وتشتت تفكيرك حد في مجموعة بيشتتك عن شرح المستر انقلي مجموعه تانيه مصلحتك اهم ، هتلاقي ناس كتيرة بتقرب وبتبعد وناس ثعبانيه اقفلي علي نفسك ، درجات امتحانات الدروس مش مقياس ليكي ابدا ، حاولي توازني بين مذاكرة المواد متجيش علي مادة عشان مادة تانية نهائي".

وأخرى كتبت: "اوعي تاخدي أكتر من درس في نفس المادة، هتضيعي وقت ومجهود في الفاضي خدي مع المستر أو المس اللي مرتاحة معاهم بس ومتاخديش مع حد عشان كل الناس بتقول عليه شاطر وانتي مش مقتنعة بيه".