«كل ده نوم؟!» جملة صغيرة تُشعل الخلافات بين الحماة وزوجة ابنها

نشرت امرأة مشكلتها على موقع التواصل الاجتماعي "فيسبوك"، حيث تشكو من حماتها التي تردد جملة انتقاد معينة لها كلما تراها، على الرغم من وصفها للمشكلة أنها بسيطة إلا أنها أشعلت الخلافات بينهما وتبحث عن حل لدى النساء المتابعات على "الفيسبوك".

وكتبت في منشورها: «السلام عليكم دلوقتي مشكلتي بسيطه وتبان تافهه بس معلش استحملوني دلوقتي حماتي كويسه معايا وكل حاجه بس كل منزلها تقولي هو كل دا نوم ! مش فاهمه ليه كل متشوف خلقتي تقولي الكلمه دي مع اني اوقات بكون مكلماها ومعرفاها اني صاحيه وبكون قايللها انا عملت اي مالصبح وكدا ومثلا ساعتين وبنزلها الاقيها بردو بتقولي كل دا نوم !!!! مع انها عارفه اني كنت صاحيه وحتي لما مبنتكلمش وانزلها شويه عشان نقعد مع بعض تقولي نفس الكلمتين ف حد يقولي ارد عليها اقولها اي بشياكه عشان تبطل تقولي كدا».

وكانت التعليقات جميعها إيجابية تدعوها لتقبل حماتها واعتبارها مثل والدتها، حيث قالت سارة: «وهي كل كلمة تتقال لازم نكون مجهزينلها رد لو امك اللي بتقولهالك كنتي هتعدي الموضوع وهتاخديه انه عادي لكن عشان حماتك اللي قالتها يبقي لازم نحط تحتها  الف خط».

كما علقت إيمان: «متاخديش كل حاجه بتنشنه ولا انها قاصده وخصوصا انها كويسه زي ما بتقولي ف يا بتهزر يا بتنكشك و امهاتنا عموما بتصحي بدري ف لازم يقولولنا كده ف فعلا كبري دماغك».

وقالت رضوى: «هي تقصد من النوم انك مبرطشه فوق أما تقولك كده تاني قوليلها اومال مين لسا مكلمك وقالك انو صاحي خيالي ... مره تانيه تقولك قوليلها انام براحتي بقا واخد راحتي شقتي زي الفل ومش ورايا حاجة ربنا يساعدنا علي فعل الخير».

بينما علقت بسنت ساخرة: «دي حماتك ولا ماما اوقات اطبق باليومين والتلاته وهي تكون عارفه وبردو تقولي انتي مبتشبعيش نوم معرفش المفروض انام في السر ولا اعمل اي ».

وقالت مريم: «عادي بتنكفك و مدام هي كويسة خديها هزار عادي و راضيها و قوليلها يا ست الكل انا متاخرش عليكي، متبرريش نفسك ولا تدايئي، نهائي و لو الموضوع مدائيك اوي يعني، قوللها انتي واخده عني فكرة غلط انا هموت و انام، و خلي بالك هي ممكن تكون عيزاكي تنزللها و تقعدي معاها اكتر بس في ناس مبتعرفش تعبر نهائي و دي طريقتها».

وعلقت زينب: «بتحبك وعايزاكي تنزليلها وتقعدي معاها سيبك من قلة الذوق اللي في الكومنتات».