«والدي بيحتضر وجوزي مانعني من زيارته اعمل ايه؟!» والنساء على فيسبوك: «يغور جوزك»

نشرت إلى النساء المتزوجات مشكلتها مع زوجها على موقع التواصل الاجتماعي "فيس بوك"، وكتبت على أحد الجروبات الخاصة بالنساء: «جوزي مانعني من زيارة والدي وحلف عليا بالطلاق لو روحت ووالدي بيحتضر وطلب يشوفني وانا نفسي اشوفه اعمل ايه؟؟ انجدوني».

وكانت التعليقات من النساء بعضها يؤكد أنه من الضروري طاعة الزوج، والبعض ينصحها بالذهاب لوالدها وبر الوالدين وطاعة الله أهم من الزوج.

وعلقت شروق: «روحي لابوكي عشان لو مروحتيش هتفضل نقطة سودة فحياتك انتي وجوزك طول العمر والرجالة بطبعها بجحه هينسى وانتي اللي هتموتي بحصرتك روحي لابوكي ضل الحيطه احسن من الراجل اللي معاكي ».

وقالت غادة: «ما يغور جوزك يجي غيرو عادي ابوكي أهم».

وعلقت آية: «لا يجوز انه يمنعك بدال انتي استأذنتيه يقدر يمنعك في حاله واحده بس ان اهلك بتوع مشاكل وانك لما تروحي بيحصل مشكله بينكوا بسببهم! مش ان والدك مريض و هيموت ربنا يشفيه و يعافيه و يهدي جوزك! الناس بقد جاحده كده ليه!».

وقالت رانيا: «كل واحدة غير التانية بس بالنسبالي أختار أهلي بلا نقاش والي مايقدرش أهلي في أبسط المواقف مش موقف موت زي الي انتي فيه يبقا مافيهوش خير وخسارته أحسن والله، ربنا يبعد عنك وعننا شر خلقه قساة القلوب».

وعلقت أسماء: «علي فكرة هو حرام انك تعصي أمر لجوزك بس في اي حاجة بعيده عن حق أمك وابوكي عليكي يبقي هو اللي عاصي ومذنب لو منعك عن صلة الرحم وعن حاجه ربنا أمر بيها، وسمعت شيخ بيقول ان لو هو امرك تعملي حاجه تغضب ربنا اعصي كلامه وروحي لأهلك لأن هو مش من حقه أنه يحرمك منهم ولا يمنعك عنهم».

وقالت ياسمين: «واحدة ابوها دخل الجنة لما طاعت جوزها وماراحتش شافته قبل ما يموت ولا حضرت جنازته الرسول بشرها ان ابوها دخل الجنة بسببها حسبي الله ونعم الوكيل في جوزك وفي اي حد قلبه حجر كدة ربنا يحسسه بنفس إحساسك ولعلمك انا قلبي مايطاوعنيش اني اقولك اسمعي كلامه دا منه لله».

وعلقت بسمة: «لا طاعة لمخلوق في معصية الخالق ربنا امرك ببر الوالدين وأمرك بصلة الرحم، مينفعش تقاطعي أهلك لأي سبب من الأسباب ولا عشان خاطر أي حد».