تعرف على طرق التعامل مع الدراسة بعد تأجيل الامتحانات

الأحد 03/يناير/2021 - 11:30 ص

نادية أحمد

كشفت عبير أحمد، مؤسس اتحاد أمهات مصر للنهوض بالتعليم، وائتلاف أولياء أمور المدارس الخاصة، عن خطط وطريقة تعاملهن مع أبنائهن بعد قرار استكمال الدراسة "أون لاين"، وتأجيل الامتحانات لما بعد انتهاء إجازة نصف العام الدراسي.

وطرحت عبير أحمد، سؤالًا ونقاشًا مع أولياء الأمور من الأمهات على صفحة اتحاد أمهات مصر، عبر "فيس بوك"، حول هذا الأمر، حيث تفاعلت العديد من الأمهات، وقالت إحداهن: "أنا هخلي ابني كل يوم يحل امتحان مادة، وكل يوم يراجع مادة"، وتابعت أخرى: "حقيقة إحنا لسه مخلصناش المنهج ولسه بنذاكر وبنراجع على اللي أخدناه وفيه وقت طبعًا للعب والموبايل".

وأضافت ولية أمر أخرى: "متابعة البرامج التعليمية على قناة مدرستنا، بفكر أشوف المنصات وتدريبات ومراجعة بهدوء من غير استعجال"، واستكملت أخرى: "المدرسة هتبدأ معانا من اليوم "أون لاين" في نفس الميعاد من الساعة 8 الى الساعة 2، بعد كده هناخد وقت للراحة إذا أراد ربنا ونحاول نشوف أخد إيه ونحل عليه أو نراجع على حسب، بس ربنا يهدي الأولاد لأنهم للأسف مقتنعين أنهم في إجازة ومسيطرة الفكرة عليهم".

وتابعت ولية أمر: "العيال طبعًا متعبين جدا لأن مافيش نوادي ولا مدارس لكن كله يهون ماداموا في حضننا، بنحاول نذاكر تارة ونلعب تارة وبعد صدور القرارات الأخيرة الضغط أصبح أقل على الولاد فى المذاكرة لسه في وقت يعملوا كل حاجة بنحاول نشجعهم يرسموا يتعلموا لغة جديدة وأوقات طبعا بنحاول نقنعهم مايتخنقوش مع بعض".

"نخلص المناهج الأول.. لسه فاضل علي الأقل درسين في كل مادة دا بالنسبة للإعدادية ونراجع اللي فات"، هكذا رأت ولية أمر أخرى مضيفة: "كل يومين هنراجع مادتين ونحل أسئلتهم عشان بنتي متنساش المنهج لأن حرام نوقف مذاكرة خالص هاينسوا كل المنهج اللي طلع عينينا في مذاكرته وخلاص كنا امتحنا العملي وداخلين على النظري ونخلص وبعد كده هناخدلنا أسبوعين إجازة نريح ونرجع نراجع تاني لأن أعتقد بنسبة 90٪ مفيش امتحانات بعد يوم 20 فبراير لأن الحالات في زيادة فمينفعش نوقف مذاكرة ونضيع تعب الترم على الفاضي وربنا يقوينا".

وقالت ولية أمر أخرى: "وقفت الدروس وبدأت تحفيظ قرآن لمدة أسبوعين مع متابعة لو أمكن قنوات التعليم دون إجهادهم، صراحة إحنا خلصنا المنهج وذاكرنا كويس الحمد لله، لما يقرروا الرجوع إلى المدارس نبقى نراجع ونستذكر، أنا مش هضغط عليهم صراحة عملوا اللي عليهم حبايبي".