آية شعراوي تكتب: كلهم بيمشوا ليه ؟

أكيد فى حياتك شخص علاقاته دايما مبتكملش أو يمكن تكون أنت الشخص ده.

الشخص اللى علاقاته بتنتهي بسرعه.. أى ارتباط مش بيكمل أو صدقاته مش بتستمر. وتسمع جملة " كنا صحاب جدا فجأة بعد واتغير"وندخل فى علاقات تانيه ونفس السيناريو فى علاقاتك بيتكرر.

وفى الغالب تفسيرك إن الناس كلها بقيت وحشه أو إن المشكلة عندك وفيك وأنك متتحبش..

طيب مفكرتش ليه إن ده ممكن يكون بسبب طريقتك الغلط.. بتتعامل كل مرة مع الشخص الجديد بنفس الطريقة ومستني منه نتيجة مختلفة ازاى.

هات أي علاقة من الأول وشوف ممكن يكون الغلط فين..

مش يمكن أنت اللي بتتسرع في الحكم بتحكم على اللى قدامك إنه شخص يتحب وينفع يدخل حياتك قبل ما تعرفه كويس.

خليك متأكد إن كلنا في اللقاءات الأولى بنكون الطف الكائنات وطول ما في مسافه والعلاقة من بعيد لبعيد بنبقى خفاف على القلب ومبنزعلش بعض.. ليه بتكَون حٌكم في "حلاوة البدايات" فى حين إن الصح انك تستنى وتعرف اللي قدامك كويس ليه بتنجرف بمشاعرك و "الله هي دى الصاحب الجدع او "هو ده الشخص اللي ينفع أكمل معاه حياتى" وانتو لسه عارفين بعض.

وممكن بردو إنهاء علاقاتك بشكل متكرر انك شخص معطاء بزيادة اه تخيل ده ممكن يبقى سبب لأن فى أشخاص العطاء بزيادة بيخوفهم بيحس أنه مش قادر يواكب عطاءك ويبادلك طيبة القلب بيبقي لسان حاله بيقول " ايه ده انت كويس اوى كده ليه لا انت خنقتنى أنا هخلع منك" لأنك للأسف بتكشف حقيقته قدام نفسه ومعاملتك الكويسه ونيتك الطيبه بتفكره دايما بالوحش اللى جواه تقدر تقول غيره غيران منك ف مش حابب يشوفك قدامه طول الوقت.

وفى اللي بيحس إنه أخد كل حاجه خلاص ف يمشي ويروح يشوف غيرك حد جديد حاجه فريش مش مستخدمه ومستهلكه زيك بعد ما يكون استغل مشاعرك وطاقتك ووقتك..

وممكن تكون بتنجذب كتير للشخصية اللى مالهاش في العلاقات طويلة الأمد طبعه كده مش بيحب يبقي فى علاقة جادة وطويلة "مالوش صاحب أو عزيز" المشاعر عنده كلام فارغ .. شخص قاسي في المطلق يعنى الموضوع مش شخصي معاك خالص.

أى كانت الأسباب اللي ممكن نفكر فيها لازم تعرف إن استمرار الفشل في العلاقات مش بيقلل منك ولا ينفع تفقد الثقه في نفسك ولا في اللي حواليك ولا ينفع تفكر ان كده لازم اكون شخص سيء ومش معطاء علشان استمر في علاقة لا الموضوع محتاج انك تتعامل بصفاتك الحميدة بحكمة واتزان وتحط الصح فى مكانه الصح وتدى كل شخص حجمه ومكانته فى حياتك اللى تليق بيه بعد ما تتأكد كويس ان حكمك عليه صح ، العلاقات الإنسانية معقدة جدا ف مينفعش تتعامل معاها باستهتار وزيرو تفكير وتضايق من النتائج السلبية.

الناس اللى بتمشي دايما من حياتك حولهم من خيبات امل لدروس بدل ما تزعل على العلاقة وتدخل فى اللى بعدها بدون تفكير اقعد وفكر مع نفسك والاهم انك تصارح نفسك مش يمكن انا اللى غلط مش يمكن اهتميت بزيادة واديت كل اللى عندى دفعة واحدة قدمت عطاء بزياده بدون مبرر ممكن يكون اللى قدامك مكنش محتاجة اصلا ف يبقي حطيت حاجه صح فى مكان غلط ف كانت النتيجة اللى وصلتلها.

العلاقات وسبب استمرارها بعد توفيق ربنا هو ذكاء الانسان فى ادارة العلاقات اللى لو مش موجود عندك تقدر تكتسبه بمنتهى السهولة لو اشتغلت على نفسك وجربت تتغير شويه لكن اصرارك انك مش هتعرف تتغير او ان انا كده تمام والناس هى اللى وحشه هيخليك طول الوقت تخسر علاقات وبتغرق في الوحدة .بدل ما ترهق نفسك وطاقتك فى علاقات كثيرة راجع افعالك واعرف ايه وصلك لكده حتى لو افعالك لقيتها كلها صح وان اللى قدامك هو اللى مقدرش ف للاسف هتبقي غلطك بردو انك حكمت من الاول غلط على الشخص ده واتسرعت.

 فى المجمل .. فى اي علاقة حاول فيها تبقي معتدل فى توقعاتك ومشاعرك لحد ما تتأكد أنك مع الشخص الصح فكرة ان الشخص بيسأل وبيهتم ومحاوط اللي بيحبه بالحب والمشاعر مش دايما بتكون فى محلها ..مش معنى كده اننا نتقل على بعض لا نتقل في نفسنا ومننجرفش بمشاعرنا في اى كانت ايه العلاقه انجرفوا براحتكم لما تتأكدوا ان اللي قدامكم يستاهل بجد .

طبعا كل الكلام اللى فات ده كان للشخص السوي النقى اللى بيفشل في علاقاته والناس بتبعد عنه ومش عارف السبب لكن طبعا الشخص اللي " تس تس انا الثعبان" في نفسه عارف كويس الناس بتبعد عنه ليه ف ميعملش دور الضحية ويحس ان الكلام ده ينطبق عليه.

اقرأ أيضًا..

آية شعراوي تكتب: طبخين صراع إيه على الغدا النهاردة