آيه شعراوي تكتب.. متعملش فيها من بنها
الخميس 17/فبراير/2022 - 08:52 م
![هير نيوز](/upload/photo/news/4/9/800x450o/120.jpg?q=1)
في أي علاقة لما يكون طرف بيشتكي والطرف التاني مش بيستقبل تحس الكلام بيعدي قدامه زي الهوا مش بيسمعه وللأسف مضطرين نوجه كلامنا النهاردة لأبطال العالم في تكبير الدماغ "الرجالة" -بعضهم- مينفعش تعمل فيها مش من هنا كل ما شريكة حياتك تنبهك لحاجة مضيقاها..
هو مش نكد على الفاضي زي ما بتقول ولا هي بتكبر المواضيع ولا هي مش حاسه بلي أنت فيه وكل التبريرات اللي طول الوقت بتضيع مجهود في إنك تقولها مع أن المجهود ده ممكن تعملها بيه اللي هي عايزاه
مينفعش لما يتقالك أنا مش حاسه بحنيتك يتنفض ونعتبر ده نكد
مينفعش لما تقولك أنا حاسه إننا بعدنا عن بعض تعتبر ده فراغ
مينفعش لما تقولك أنا بحس منك بالإهانة وقت زعلك وغلطك تشوف إنها كانت تستاهل وده رد فعل طبيعي
ولما بتقولك إنك شايل إيدك من مسؤولية البيت والأولاد مينفعش بدل ما تحاول تساعدها تقلل من اللى هى بتعمله وتحسسها "انتى بتعملي ايه زياده يعنى عن أى ست أو أى أم"...
مينفعش بعد ما قررت إن الاهتمام بيطلب عادي وتطلبه بكل صراحة ووضوح منك فتهتم يومين وترجع تاني لنفس الطريقة
مينفعش تديك إشارات إن حبك جواها أقل وتشوف إن ده تهديد عبيط منها وإنه مش حقيقي
لا حقيقي وأقولك على الحقيقة الأكبر الست بتقول نص مشاعرها حفاظا على مشاعرك أنت يعني مش هتقولك وش إنك مبقتش مالي عينها لكن هتجمل الكلام وتقولك إنها حاسه إن علاقتكم مش زي الأول
مش هتقولك إنها بقيت تبص على غيرها وتتمنى حياتهم بس هتقولك عايزه اتعامل كويس زي أي حد
السؤال هنا … ليه الإنكار ؟! ليه بنسمع من اللي قدامنا شكوته ومبنفكرش نصلح ،،
إيه الضمان الفظيع بامتلاك اللي قدامك وإن كبيرها هتقول كلمتين وخلاص
لا احنا في زمن الست فيه مبقتش تشتكي بس وتسكت وتتغلب على أمرها إحنا بقينا نقرر نخرب بيوتنا عادي ونقول علشان عايزين نعيش حياة سعيدة والعمر قصير ليه نعيشه بنتسول فيه حبة مشاعر واهتمام ومعاملة سوية لما بقينا ايقونه للتريقة ورمز للنكد، حتى السمعة دي طلعت من باب تريح الدماغ - هما الستات اللي نكديين لكن احنا تمام - نكران بس.
سؤال بسيط .. لو مديرك في الشغل طلب منك تقعد معاه وتتكلم وطلب منك تحسن أدائك في الشغل هتعمل كده وهتتشقلب علشان ترضيه لكن مراتك لو عملت كده تبقي مش حاسه بيك وبتنكد زي ما بتخاف علي شغلك واستقراره خاف على بيتك واستقراراه
اعتبرها آنسه رشا اللي معاك في الشغل يا أخي 😒!! اللي بتقعد تسمع مشاكلها وتتأثر وتحاول تحلها معاها وتتابع مشكلتها مع خطيبها وصلت لفين !😒
ابذل مجهود انت مش واخد معاها شهادة ضمان ان قلبها مش هيتغير لا بيتغير عادي زي ما حبيتك من تصرفاتك وأفعالك عادي جدا حبك يتشال من قلبها من تصرفاتك وافعالك بردو..
فكرة إنها تطلب الحاجه منك مره واتنين وعشره مش معناه إنها بتنكد لا معناه انك نفضت مره واتنين وتلاته و١٠ مبتسمعش ومبتحاولش وكمان هتطلعها زنانه مش فاهم ان تكرارها وإصرارها دليل انها لسه بتحبك لسه بتحاول في العلاقة وبتطلب مساعدتك..
الموضوع مش محتاج غير إنك باهتمام باهتمام ونية حقيقية في التغيير حتى لو مش مقتنع فهم نفسك ان يمكن فعلا الغلط عندك أو إن دي حاجه مهمه بالنسبالها ف لازم اشبع عندها الاحساس اللي مفتقداه معايا .. ده واجبك..
عارفه إن كل الرجالة مضغوطه في شغل واتنين وعارفه كم المسؤولية والحمل بس عارفه برضو إن البيت مهم زي الشغل ومحتاج مجهود مستمر وإن لو البيت هادي من المشاكل هينعكس عليك وعلى راحتك مهو مش هتبقي مطحون بره "ومتنكد" عليك جوا .
اقرأ أيضًا..