أمهات مصر يجبن على سؤال "لو كنتي وزيرة تعليم"

السبت 26/ديسمبر/2020 - 11:58 ص

منار مجدي

طرحت عبير أحمد، مؤسس اتحاد أمهات مصر للنهوض بالتعليم، وائتلاف أولياء أمور المدارس الخاصة، سؤالًا على أولياء الأمور من الأمهات وهو: "لو كنتي وزيرة تعليم هتتعاملي إزاي مع الدراسة والمناهج والامتحانات في الوقت الحالي؟".

وتفاعل مئات أولياء الأمور من الأمهات على صفحة اتحاد أمهات مصر للنهوض بالتعليم، في فيس بوك، حيث قالت ولية أمر: "كنت هدخل الولاد من آخر شهر 8 وأخلص المنهج وأمتحنهم كمان، وأكون خلصت مستريحة في شهر 12 علشان كلنا عارفين كويس جدًا إن في موجة تانية، ليه دخلنا في أكتوبر ودلوقتي بيعاقبنا ولا إية أنا مش فاهمة، بيقول الأبحاث فاشلة ما أحنا قولنا كده من أول ما أخد قرارها، دلوقتي هو اكتشف إنها فاشلة؟!".

وأضافت ولية أمر أخرى: "هعمل امتحانات online والعام القادم الدراسة تبدأ من شهر 6 وإجازة آخر العام في الشتاء حتى تنتهي الأزمة"، وتابعت أخرى: "هلغي امتحانات الأنشطة، وهخلي الامتحانات على فترات كل يوم فئة وفاصل يوم بين الفئات عشان تعقيم اللجان، اللجنة لا تزيد عن 10 طلاب والتباعد مطلوب، فحص الطلاب قبل الدخول إلى اللجان فحص فعلي مش للصورة فقط ولو الأمر ازداد خطورة سوف أؤجل الامتحانات لنهاية العام".

وذكرت ولية أمر ثالثة: "هلغي أجزاء من المنهج وهعمل امتحانات بسرعة في الجزء اللي اتاخد مع طبعًا الإجراءات الاحترازية وهلغي امتحان المواد غير المضافة للمجموع زي الكمبيوتر والرسم"، واستكملت أخرى: "هخصص جزء من المناهج للاطلاع، وهعمل اختبارات تحريرية للمواد اللي بتتضاف بس في المجموع، وهعجل بمواعيد الامتحانات، هعمل تباعد في اللجان كل مرحلة لها أيام".

وأوضحت أخرى: "سأوزع أعداد الطلبة على كل المدرسة كل فصل لا يزيد عن 15 طالبًا بالمشرفين، وأوجه بتطبيق الإجراءات الاحترازية وأنبه على التفتيش الدوري اليومي من الإدارات للمدارس وتحويل أي مقصر للتحقيق الفوري وأمل زيارات مفاجئة للمدارس في المحافظات مش بس في القاهره طول فترة الامتحانات، وهدي للناس فرصة اللي مش عاوز أولاده ينزلوا الامتحانات بدل ما الوزير يقول الولاد يعيدوا السنة ممكن يدخلوا الامتحانات دور تاني في الصيف".

وأضافت ولية أمر: "هرفع الغياب وهسيب خيار الحضور أو الأون لاين اختياري، والتقييم أون لاين أو بحث للترم الأول وامتحان الفينال هخليه في يونيو يكون الذروة انتهت مع إلغاء أجزاء من المنهج، اللي كلها حشو ونركز على الأساسيات بس".

وقالت أخرى: "أولًا غلق المدارس والاعتماد على القنوات التعليمية والإنترنت، ثانيًا عمل أبحاث وأنشطة دورية كل شهر يتم تسليمها في المدرسة أو عن طريق الإنترنت لتقييم الطلاب وتأجيل الامتحانات لحين توفر اللقاحات أو عندما يخف حدة انتشار المرض".

وتابعت ولية أمر ثالثة: "الوزير غلط جدًا في تأخير ميعاد الدراسة مع إن الجميع كان بيحذر إن شهر 12 وشهر 1 هيكونوا من أصعب الشهور للأسف، هو حط نفسه في موقف صعب عاوز يكمل وكلنا كان نفسنا ولادنا يمتحنوا ونفرح بنجاحهم ونحس بنتيجة تعبنا، وفي نفس الوقت الوضع أصبح من أسوأ ما يكون، ربنا يستر على الجميع، اللهم ارفع مقتك وغضبك عنا اللهم ارفع البلاء والوباء عنا يا أرحم الراحمين".