عبير تستغيث زوجي طردني وخطف بناتي: « بيعاقبني على رعاية والدي المُسن»

في إحدى مناطق القاهرة البسيطة، عاشت الزوجة العشرينية 7 أعوام من الحب، وتحولت قصة حبها بزوجها إلى ارتباط، تزوجا وبعد أشهر من الزواج، تحول الزوج لـ« وحش كاسر»، حيث ذاقت كل أنواع العذاب، على يديه، ووصل الأمر إلى خطف بنتيها والابتعاد عن المنطقة وتركها بعدما استولى على منقولاتها وتزوج من أخرى، لتجد نفسها أمام محكمة الأسرة تستغيث بالشرطة والقضاء لإرجاع ابنتيها.

عبير محمد، فتاة تبلغ من العمر 27 عاماً، تزوجت عن قصة حب وعقب زواجها اكتشفت أن زوجها يتعاطى المواد المخدرة، « كان ملهوف عليا قبل الجواز ومكنش ظاهر عليه أي حاجة وفجأة اكتشفت إنه بيشرب وبعدين بقى صورة تانية خالص، وعشت علشان كنت خلفت بنتي الأولى، وبعد كدة خلفت التانية، وبقاله سنتين اخدهم مني وسرق جهازي وهرب، دا كله بيعاقبني على رعايتي لوالدي المسن اللي ملوش غيري»، بهذه العبارات عبرت الزوجة المكلومة عن مأساتها.

وتضيف الزوجة، « سابني متعلقة وهرب، ورفض مساعدتي، سابني وأنا حامل في ابني التالت، وقبل ما أولد بـ15 يوم استولى على أثاث شقتي وهرب، وتزوج من غيرى، وخطف بناتي، وكنت بشتغل علشان اساعده وأساعد والدي، لكن هو مكنش عاوزني أساعد أبويا، وكان بيضربني وبيربطني  في السرير، ويعذبني،  وبيضربني في الشارع أمام الجيران، لحد ما فجأة لقيته قبل ولادتي لطفلي سرق أثاثي وهرب ببناتي، دورت عليه في كل الأماكن زي ما يكون فص ملح وداب».

لا تتمنى الزوجة المعلقة العشرينية، سوى أن يقتص القضاء لها وان يحكم بتطليقها منه وأن يمنحها حق رؤية طفلتيها:« مش عاوزة غير إني أطلق وأشوف بناتي، وحشوني وبقالي سنتين معرفش عنهم حاجة، وهفضل اخدم أبويا لأن هو سندي، ورفعت قضية وعندي أمل القضاء ينصفني».