بيضربني بآلات حادة.. "راوية" تطلب الطلاق: اشتراني بفلوسه

«اشتراني بفلوسه وأهلي باعوني عشان الحوجة».. بدأت «راوية. س» تحكي مأساتها بهذه الكلمات أمام محكمة الأسرة في مدينة نصر في دعوى الطلاق للضرر ضد زوجها «عصام. ف».

وأضافت الزوجة: «أنا اتجوزت الجوازة دي عشان أخلص من الزن اللي في البيت عشان عايزني أتجوز أي جوازة وخلاص، فقلت اختار رجل عنده فلوس واهو أعمل بالمثل القائل عريس في اليد ولا مائة على الشجر».

وتابعت:«من تاني أسبوع في الجواز وأنا الدنيا بايظة معايا، وكأني كيس فاكهة كان معروض على اللي يدفع فيه أكثر وبما إنه دفع قرشين محترمين في الجوازة دي فكان لازم يوافقوا عليه، وبدأ جوزي يصبحني بعلقة ويمسيني بعلقة ده غير الصور والفيديوهات اللي مع نسوان وبنات تانية».

واستطردت: «تزوجت من يرى الأنثى جارية وخادمة تعامل معى كسلعة اشتراها، وألقاني فى الشارع عندما أنجبت له بنت وليس ولد يرث ما يكنزه من أموال».

 

واختتمت:« لما سيبت البيت وروحت لأهلى بطفلتى وجسدي الذي يحمل علامات ضربه المبرح، رفضوا طلبى الطلاق وحاولوا إجباري على العودة له وطلب العفو منه، وعندما فعلت قال لأهلى بأنه خطب غيرى وسيتزوجها».