العمة يامنه ترد على تامر أمين: سمعت عن شجرة الدر؟!

أزمة كبيرة فجرها الإعلامي تامر آمين، بشأن المرأة الصعيدية، بعدما تعدي عليها في بعض مفرداته، من خلال برنامج "آخر النهار" حينما قال إن الصعيد والفلاحين ينجبون أبناءهم للعمل إما في "حرفه" بمبلغ 1000 جنيه شهريًا بالنسبة للولد، أو تشحن للقاهرة للعمل كخادمة بالنسبة للبنت.

وفي حوار تخيلي 100% ترد العمة يامنة بطلة قصيدة الشاعر الصعيدي الراحل عبد الرحمن الأبنودي عليه، معقبة، هو لسه ولد أمين بيطلع في الإعلام وبيقول كلام؟!.

من لا يعرف العمة يامنه فتلك أبيات من القصيدة للتعرف عليها، "حبيبي أنت ياعبد الرحمن، والله حبيبي وتتحب، على قد ما سارقاك الغربة لكن ليك قلب، مش زي ولاد الكلب اللي نسيونا زمان، حلوه مرتك وعويلاتك، ولا شبهنا، سميتهم ايه؟!، قالولي أيه ونور، ماعرفتش تجيب لك حتة واد، ولا أقولك، يعني اللي جبناهم، نفعونا في الدنيا بإيه؟!، غيرش الإنسان مغرور".

وعرفت يامنه بما صرح به تامر أمين، وعدلت قعدتها من ورا الباب وبصت للسما وسرحت شوية ورجعت قالت، مش تامر أمين ده ولد أمين بسيوني؟!، ما علينا مش هنقول عليه زاد وعاد، لكن هفكره أن الصعيد ولو فيه فقراء كتير، بس ده ميمنعش أن نسوانا جواهر بيقدموا تضحيات على مدار سنين، من أيام الفراعنة كانت أول حكيمة اسمها "بسشت" ومن الصعيد، ما انتوا ما عندكم حضارة ولا ماضي غير من الصعيد، وأول حاكمة للبلاد من الستات كانت الملكة حتشبسوت وكانت في الأقصر بتحكم ممالك بقوة وكلمة زي السيف، دخلت حربت وعملت تجارة محدش غيرها يقدر عليها حتى من أعتى الرجال.

ولو رحت متحف التحرير اللي قريب منك يا ولد أمين، هتشوف تمثال لمرة جبارة ووشها كله رهبة وهيبة، ودي أم الملك اخناتون اللي كانت من عامة الشعب وبقت مرات امنحتب الثالث، وعلمت ولدها خير علام، وخلته ملك ولا فيه زيه في الزمان، وكانت هي المستشارة ليه وبتقوله يعمل ايه، أصل حكمة ستات الصعيد عمرها ما كانت النهاردة بس، دي من أيام جدودنا من 7000 سنة، وانت جاي تقولي بنروح لبلادكم نمسح ونكنس لعيالكم، والله عيب يا ابن أمين.

سمعت يا تامر يا أمين عن شجرة الدر؟!، اهي دي كانت جارية في مصر، ومسكت بيت المال لما اتجوزها جوزها السلطان الصالح أيوب، لكن علشان عقلها رشيد بقت ملكة في وقت قليل، ساعدت جوزها في حكم البلاد، ومسبتهوش في المرض ووقفت وتد في وش الأعداء، واحترمها الكل حتى اللي كان عاوز يخلص منها لأجل الكرسي والجاه والمال.

طيب تعرف يا ود يا تامر يا أمين، أن أول أستاذة للأدب العربي كانت من طنطا، يعني من الفلاحين اللي لسانك هانهم مع الصعايدة علشان عقلك مش رزين، وكمان اتفوقت على 14 راجل درسوا معاها الأدب في جامعة فؤاد الأول سنة 1929، ودخلت البرلمان سنة 1967، وتقولي الفلاحين والصعايدة ستاتهم مش عارف ايه، ياخي يا عيب الشوم.

تعرف أن أمينة السعيد، من أسيوط، وكانت هي أول رئيس تحرير لمجلة "حواء" سنة 1954، ووزعت 175 ألف نسخة، وانت مش بيشوفك 175 واحد رغم التكنولوجيا اللي بوظتك وجابت لنا الكلام، بس نعمل ايه، الطبع غلاب ومش عاوزين نكتر في الكلام، ولما نرجع للفلاحين هقولك سميرة موسى ست الستات بقت أول عالم ذرة في مصر ولولا موتها كانت نجحت في علاج السرطان بيه ربنا يعفي عنا وعنك وعن السامعين، وتبطل طولة لسانك على الصعايدة والفلاحين.

خالتك يامنه يا تامر أمين، مش عاوزة تقولك أن الصعايدة والفلاحين ناس مأصلين، لأن الأصل في كل مكان موجود ومتصان، لكن انت طولت لسانك وخليني أقولك على حاجات لازم تعرفها انت وغيرك كمان، يا ولدي الغلط مش عيب، لكن العيب أن الراجل يهلفط في الكلام، وكل الستات اللي فوق دول عينة صغيرة من نماذج ستات في الصعيد والفلاحين عملوا معجزات، وأقل واحدة ربت عيالها على الأصول وحفظ اللسان، علشان كده احنا كلمتنا عقد ومش أي كلام.

هكمل كلامي ليك يا تامر يمكن تعرف أن العقل زينة، الكلام اللي قلته شين، واحنا عمرنا ما هنرد زيك، لأن الشين له أهله واحنا مش بتوع كلام، كنت تقدر تتكلم عن الجهل والفقر والعدم عندنا في الصعيد، اللي بيخلي أكل العيش صعب ومش موجود، أو تتكلم عن التعليم اللي كان مفروض تنورنا لكن محدش سأل فينا، كان تقدر تقول أن العيال عزوة بس حالة الفقر بتاعتنا لازم نعملها حساب، بس انت اختصرت الطريق على نفسك وقفلت 1000 باب، ليه متكلمتش عن حق الستات اللي بيتاخد في الورث، ولا الختان اللي بيتعمل غصب عن الكل، أو حتى اتكلمت عن الحرمان من التعليم، ماهو المرة الحكيمة خالتك يامنة، جاهلة ومتعلمتش بس طول عمرها كلامها حكيم.

مش يمكن لو اتكلمت في حاجة من دول كنت لقيت مبادرة من الرئيس بيساند فيها ست الصعيد، ولا حتى كنت لقيت صوت يتكلم معاك بالعقل بدل ما طلعت تتمحلس وتقول كني غلط وبتأسف على اللي اتقال، أسف ايه اللي عاوزنا نقولك فيه معلش وانت مجتش لدارنا تقول أنا غلطان، ولو التكنولوجيا نفعاك توصل للكل، فأنا ست أمية معرفهاش محتاجة تيجي وتقولي في وشي أنا غلطان، ولا بلاش تيجي، خليك مطرحك علشان لو جيت مش هقدر أرد عليك، وأقولك اللي نفسي فيه.

ولدي يا تامر أمين خلاصة الكلام الماسخ اللي ملوش طعم ولون، انت لو عاوز تعتذر قول الحقيقة أن الست مظلومة، وبناتنا كمل ولما بتجيهم الفرصة بينجحوا وبياخدوا مناصب من أعظم المناصب، ولما بيسافروا بره بيكونوا أحسن سفراء لمصر، لازم الصعيد يتطور ويعلم البنات، ويديهم فرصة في الثقافة والفن والرياضة كمان، انت تعرف ان الصعيد الجواني فيه لاعبات كرة اشي سلة واشي قدم واشي تنس وسرعة، لأ وكمان ايه، عندنا حكم راية وساحة من الصعيد، أهلهم علموهم وخلوهم يحققوا حلمهم علشان متعلمين، لكن تقولي نشتغل خدامات والله عيب على اللسان واعتذارك مش مقبول، اطلع واتكلم عن العلام والصحة والثقافة وأكل العيش، دي المرأة المعيلة في الصعيد عيالها بكرة عيكونوا في مناصب أحسن منك ومن اللي شغلوك.