بعد التنمر عليها... اللاعبة مروة عبدالملك: أنا بنت بـ 100 راجل

تصدر اسم لاعبة النادي الأهلي السابقة لكرة اليد، مروة عيد عبدالملك، والمحترفة الآن في صفوف فريق نيس الفرنسي قائمة الأعلى بموقع التغريدات، "تويتر"، بتغريدة "ادعم مروة عبد الملك"، وذلك بعد تعرضها للتنمر، عبر مواقع التواصل الاجتماعي المختلفة.

وعلقت اللاعبة عبر حسابها على موقع التواصل الاجتماعي "فيس بوك" قائلةً: "هما ضد التنمر على شيكابالا عشان حرام وكده وإنهم ناس مؤدبين زيه بالظبط بس يخشوا يتنمروا عليا، أنا عادي دون أي مناسبة، شيزوفرينيا عجيبة عند الناس دي والله ربنا يهدينا ويهديكم".

وتابعت: "وضحت موضوع شيكا ألف مرة ومش هتكلم فيه تاني اللي عايزه أقوله بس، محدش فينا بيختار شكله ولا أهله ولا لونه، ولكن بنختار مستقبلنا ونسعى إننا نغيره للأحسن، فمش واحد زيك بفكره المتخلف هيفكر يهدني بكلام فيه تنمر على شكلي وصوتي ولوني، دي حاجة بتاعة ربنا، مش كلام واحد تافه زيك هيفرق مع واحدة بقالها 11 سنة في الغربة، عشان تعمل لنفسها اسم وتاريخ وتخلي الناس تتكلم عنها، وأكون أول بنت مصرية تحترف وكابتن فريق لنادي أوروبي وبكل آراء مدربيني ونجوم مصر إني أحسن لاعبة في تاريخ مصر وده بفضل ربنا وكرمه عليا ومجهود سنين".

واختتمت: "أنا بنت بـ100 راجل، لكن إنت ولا فيك ريحة الرجولة... شكرًا جمهور الأهلي العظيم السند والوتد الحقيقي".