هنا الزاهد: قلبي اتكسر.. هيبقى صعب جدا حد يدخل حياتي

حلت الفنانة هنا الزاهد ضيفة على الإعلامي الإماراتي أنس بوخش في برنامج “abtalk” مساء اليوم الثلاثاء على قناة يوتيوب.

وكشفت هنا الزاهد العديد من الأسرار في حياتها الفنية والشخصية بعد الإنفصال عن الفنان أحمد فهمي.

وقالت: "هنا": اكتشفت أن قلبي ده لازم أحافظ عليه وهيبقى صعب اوي حد يدخل حياتي، عارف لما قلبك يتكسر أوي، قلبي حصله كده، ورممت قلبي لوحدي، أهلي ساعدوني ووقفوني على رجلي، لكن لما ببقى لوحدي بلاقي قلبي مكسور".

وأضافت:" "مفيش حد هيدخل حياتي غير لما أبقى عارفة أنه صح أوي، واللي بفكر فيه دلوقتي هو أبسط هنا واي حاجة كنت عايز أعملها بعملها حتى اللي مكنتش بعملها، أنا وقت زواجي كنت ناسية هنا وكنت بدي الأولوية للقدامي اكتر مني لأنه التوب بالنسبالي بعد ربنا".

وقالت هنا خلال الحوار "اتطلقت في أواخر 2023، والحمد لله تخطيت طلاقي وهذه أحسن فترة في حياتي وشخصياً مكنتش أعرف إزاي هعدي، وتخيلت أن حياتي وقفت خلاص مش علشان الحب وكده، لكن لقيت الحياة بتكمل والحياة حلوة عادي"، وأضافت بصدق "كنت بشوف أي ست تتطلق وأستغرب إن ده بيحصل ومكنتش متوقعة إن ده يحصلي، لحد ما اتعرضت للطلاق بس بقيت أحسن دلوقتي وبركز مع نفسي".

هنا الزاهد لا تحب الشهرة بسبب فقدانها للخصوصية

كما تحدثت الفنانة هنا الزاهد عن تجربة انفصالها عن زوجها السابق، مشيرةً إلى أنها لا تحب الشهرة بسبب فقدانها للخصوصية.  

وقالت هنا الزاهد خلال لقاء تليفزيونى: متحدثةً عن فترة وفاة زوج والدتها، الفنان طلعت زكريا: زوجي اللي كان في حياتي كان بيقولي إنتي زعلانة أوي على وفاة طلعت زكريا ليه؟ بس أنا مكنتش بعتبره مجرد زوج أم.. أنا عشت معاه 14 سنة وربنا عوضني بيه عن والدي.

وتابعت هنا الزاهد: انفصال والدي ووالدتي وأنا صغيرة خلاني مخي أكبر من سني وبدور دايما على الراجل اللي أكبر ومني وزوجي السابق كان أكبر مني بـ 14 سنة.

كما قالت الفنانة هنا الزاهد إنها تحتفظ بالكثير من الذكريات الجميلة عن والديها قبل انفصالهما.

وأضافت:"طبعا أفتكر ذكريات كتير، كانت علاقتهم حلوة جدا، وانفصلوا بطريقة راقية جدا لما حسوا إنهم مش مناسبين لبعض، وحتى الذكريات اللي فاكراها لهم حلوة، والذكريات الحلوة بتوجع أكتر من الذكريات الوحشة"

وأوضحت هنا الزاهد أنها بقيت على تواصل مع والدها بعد انفصاله عن والدتها قائلة: "هو كان مبيكلمنيش كتير لكن بيسأل عني على فترات وعنده عيلة ومشغول بيهم، وأول مرة كلمني مكالمة طويلة ساندني وقال كده أحسن ليكي، وفضلنا على تواصل على فترات".