دعاء فاروق تهاجم برامج الفلك: كفر ومش خايفين من العذاب العسير

هاجمت الإعلامية دعاء فاروق، البرامج التي تقوم باستضافة علماء الفلك والأبراج على قنواتهم، مؤكدة أن ذلك نوع من الكفر، خاصة بعد صدق تنبؤها بطلاق ياسمين عبد العزيز وأحمد  العوضي، وضجيج السوشيال ميديا بفيديوهات ليلى عبد اللطيف.

خرجت دعاء في فيديو على حسابها الرسمي بموقع انستجرام، هاجمت من خلاله علماء الفلك والبرامج التي تقوم باستضافتهم وقالت: "الست اللي طلعت في البرامج عشان التوقعات، والبرامج اللي بتظهر فيها المفروض إنها محترمة، على قنوات وفريق إعداد محترم، الناس دي متعلمة دارسة إعلام، أساتذة كبار في عالم الإعلام والتقديم التلفزيوني، وبيجبوا عندهم ناس بيقولوا عليهم علماء فلك، وبيتوقعوا حاجات عن الناس، وبعدين نقول التوقع طلع صح.

وأضافت دعاء فاروق: "أنتم متعرفوش أن دي أعمال كفر بين، وفي شيء اسمه تسخير جن، لما نجي نقول ده بيسخر جن وبيعملوا أعمال كفر، وبيدخلوا بالقرآن في أماكن سيئة، عشان يطلعوا الجن ويقول كلام من المتشقلب".

أنا لا يمكن أفتح التلفزيون في الوقت اللي بتجي فيه الفقرات دي، بناخد ذنب كبير أنا بعين واحدة بتعمل أعمال كفر، إنها تنتشر وتبقى مهمة وتبقى أحسن من العلماء والدكاترة.

وتابعت دعاء فاروق: البرامج بتجيب عالمة فلك، وهي مش عالمة فلك بتتواصل مع ناس بيعملوا أعمال كفر، ده شيء معروف أنتوا عايزين  تنساقوا وراء الكفر اللي فيه حرمانية واضحة، أنتوا مش خايفين يا سادة يا قائمين على هذه البرامج من العذاب العسير، لأنكم بتشكلوا وجدان الأمة والناس، ومحدش ضامن عمره، أنا ممكن أموت حالًا، ده التاريخ اللي هسيبه أن أجيب واحد بيعمل أعمال كفر ويسخر جن عشان يجبله أخبار عبيطة دي أخبار عبيطة مش غيب.

وأردفت دعاء فاروق:  ده دجل وشعوذة، وأعمال سفلية، وأعمال جن، عيب أحنا ناس متعلمين ودارسين في أحسن الأماكن، لما تجي تشكل وجدان الأمة بشيء منحط، ويصعب عليا أن في مذيعين بحبهم وشاطرين جدًا  ينساقوا في السكة المتخلفة دي، وكده بفتح باب كبير أن الناس تمشي تؤمن  بأشكال تعمل أعمال كفر.

واختتمت دعاء فاروق: لو هي قالت التوقع وطلع صح، ده يخلينا نتأكد أن الناس دي بتحضر حاجات عن طريق حرام، وبيحضروا جن عشان يقولهم معلومة، الجهل بقى على أكبر قنوات وأهم شاشات ويجني كل هذه المشاهدة، ويعمل كل هذه الدوشة، وهي بتكون يا  محضرة جن، يا تعرف حد يحضره ليها.