وبدأت «نجلاء» حلقتها من برنامج «ممنوع السكوت» بقولها: «للأسف الشديد مؤخرًا، ستات كتيرة قدام محاكم الأسرة رفعوا قضايا على أزواجهم عشان بيصورهم في أوضاع مخلة، الحكاية مبدأتش دلوقتي، هي من زمان شوية، لكن يمكن التطور التكنولوجي اللي احنا بنعيشه وصل لحد غرف النوم».

وأضافت: «كلنا عارفين إن المزاعم الأولى وراء الأفعال الشاذة دي، الاستمتاع والرغبة في تسجيل ذكرى جميلة.. ودا بالمناسبة اللي هيأكدوا السواد الأعظم من الرجالة، لكن في أسئلة كتيرة محدش جاوب عليها، منها مثلا: هل دا سلوك سوي.. هل الزوج دا عنده أبجديات القوام الأسري، هل أصلا يعرف يعني إي زوجة، ويعرف يعني إيه عرضه وشرفه.. طب وليه ممكن راجل ممكن يحب يصور مراته في الأوضاع دي مثلا.. وهل دا حرام؟»

وتتابع حلقة «ممنوع السكوت» على «هير نيوز»: «الحكاية بدأت في جروب خاص بالنساء، على فيس بوك، واحدة بتشتكي إن جوزها بيصورها أثناء العلاقة، وإنها معرفتش غير دلوقتي، وبتسألهم عن إيه اللي ممكن تعمله، وبعيدًا بقى عن اللي اتقالها، واللي هنقوله بعدين.. لكن يكفيني أقولك إن الشكوى دا اتكتب عليها في آلاف التعليقات اللي بخصوص نفس الموضوع، لدرجة إني فكرت ساعتها - وبعض الظن إثم - إن كل المصريين بيعملوا كدا.. وإن دا عادي، قبل ما تتهمني وتقول إني بقول على التصرفات دي ظاهرة وحالة عامة.. حابب بس اشرحلك التصرفات دي من كذا زاوية».

ولفتت حلقة «ممنوع السكوت» على «هير نيوز»، إلى أن «تصوير الرجل لزوجته أثناء ممارسة العلاقة، صنفه كتير من علماء النفس إنه يعتبر اضطراب سلوكي، وإن الراجل اللي بيعمل كدا بتبقى من صفاته إنه متعودش على تحمل المسؤولية، وكمان غير مدرك لعواقب ذلك السلوك، كمان علماء النفس بيرجحوا إن الشخص دا في الغالب بيكون سيكوباتي، ودا معناه إن سلوكه معادي للمجتمع، كمان كان عنده مشاكل في الطفولة، أثرت عليه وسببتله قصور في الشخصية، وعشان كل دا، كتير من علماء النفس نصحوا الست إللى تعرف إن جوزها بيعمل كدا تطلب الطلاق فورًا، وإنها متخافش منه ومتخافش كمان من نشر اللي صوره دا، لإن القانون في صفك».

«واللي يثبتلك إن القانون في صفك، كان في زوج ابتز زوجته، بسبب خلافات بينهما، ووراها مجموعة صور وفيديوهات وهي معاه في العلاقة، واتضح إنه كان بيصورها على فراش الزوجية دون علمها، وقتها الست قالت أنا والطوفان، وقررت فعلا إنه ترفع قضية طلاق للضرر، لكن الزوج رد عليها لما طلبها في بيت الطاعة، ويوم ما جالها المُحضر.. اتفاجئت برسالة من حساب مجهول، على فيس بوك، بعتلها الزوج من عليه صور ليها، كمان مكتفاش بكدا، دا دخل على جروب خاص في شغلها ونشر صورة ليها..  لكن المشرفة على الصفحة تداركت الموضوع ومسحت الصور فورًا، وقتها وبالرغم من التهديدات دي الست كملت، وكمان نجحت إنها تخلص منه.. بعد ما المحكمة حكمت لصالحها».

وتساءلت نجلاء عياد عبر حلقة «ممنوع السكوت» على «هير نيوز»: «إذا قلنا إن الراجل اللي بيتعامل مع زوجته بالشكل ده في غرفة النوم مريض نفسي أو عنده خلل في شخصيته، هل ده كافي انه يفلت من العقاب؟؟ ولو أفلت من عقاب الدنيا هل هيفلت من عقاب الآخرة؟ وياترى إيه حكم الدين للراجل اللي بيعمل كده؟ أجمع علماء الدين على إسعاد الزوجة لزوجها بما هو مشروع مما رغب فيه الشرع، وأما تصوير الزوجة وهي عارية على شريط فيديو أو حتى عن طريق الانترنت فهذا من الأفعال القبيحة التي لا تجوز لما قد يترتب عليها من فساد ومحرمات وانتهاك للأعراض ومن القواعد المقررة في الشرع ما يسمى بقاعدة سد الذرائع.»

«معناها إيه سد الذرائع؟؟ معناها سد الطرق التي قد تؤدي إلا ما لا تحمد عقباه، يعني مثلا حتى لو نية الزوج كويسة ممكن يتعرض الزوج للسرقة فتفتضح الزوجة والزوج ويستغل السفهاء الشريط للابتزاز وتلويث الأعراض؟ وممكن كمان يتطلقوا فتصبح أجنبية عنه، وعنده لها صور وهي عارية؟ ينفع كدة؟».

وحذرت حلقة «ممنوع السكوت» على «هير نيوز» من أنه «من الممكن أن ينقلب الزوج على زوجته ولا يتقي الله فيها فيهددها بما معه من صور عارية لتشبع رغباته المحرمة أو تعيش معه ذليلة دون مطالبة بحق، أو يستولي على مالها إلى آخر مثل هذه الأفعال القبيحة التي قد تحدث واللي بنشوفها كل يوم».

 

واختتمت حلقة «ممنوع السكوت» على «هير نيوز»، بتوجيه نصيحة للزوجين: «اتقوا الله وابتعدوا عن تلك الأفعال، وللزوج بشكل خاص راعي زوجتك ولا تبتعد عنها فترة طويلة ولا تلجأ للفيديوهات لإطفار نار شوقك لها واسلك السبل المشروعة لتبريد الشهوة من الصيام والبعد عن الاختلاط بالنساء، أو النظر إليهن، والابتعاد كذلك عن الخلوة المحرمة وربنا يعافي الجميع».