حوادث

من أرشيف محكمة الأسرة| ضربني لما عرف إني حامل في بنت

السبت 18/مارس/2023 - 07:30 م

وائل كمال

بعيون متحجرة ودموع باتت أبسط ما يخفف من ثقل كارثة رانيا، التي وقفت في ركن بمحكمة الأسرة ببنها، تروي معاناتها مع زوجها بعد تعرضها للضرب والطرد بعد علمه بحملها بأنثى للمرة الثالثة على التوالي، ورددت: "بيقولي عايز ولد يشيل أسمى وسند ليا مش عايز بنات".

وتابعت السيدة: "اتعرفت على جوزى من 8 سنين واتجوزنا وكنا أسعد اتنين في الدنيا، كنا متفقين نتحدى العالم كله ونعيش على المرة قبل الحلوة مع بعض، لكن اتصدمت فيه بعد أول بنت خلفناها لقيته مش مبسوط بيها زي أي أب أن دي أول مولودة له.. وفرحته كانت مكبوتة".

وأكملت: "بعد سنتين كنا في انتظار المولود التاني لينا وهو كان فرحان مستني الولد، لكن بعد الولادة اتحولت الفرحة لبركان من الحزن، وبدأت المشاكل وكل يوم خناقة.. وقالي عايز ولد يشيل اسمى ويبقى سند ليا مش عايز بنات، طول الوقت كنت بهديه وأحاول أفهمه أن دي إرادة ربنا وربنا هيكرمنا".

وأردفت "رانيا": "بعدها بـ 6 شهور ضغط عليا وأجبرني على الحمل للمرة الثالثة، كنت مغلوبة على أمري معنديش حل، وبعد فترة زورنا الدكتور وسأله عن نوع الجنين، وكان الخبر زي الصاعقة عليه، لما عرف إني حامل في بنت وربنا ما أكرمناش بولد، رجعنا البيت اتخانق معايا وضربني وأهاني وطردني على بيت أهلي".

واختتمت حديثها: "في ناس كتير حاولت تصالحنا، ولكن كل الطرق اتقفلت بيني وبينه، والحياة بينا بقت مستحيلة"، ولجأت للمحامية نهى الجندى، وأقامت دعوى طلاق للضرر تحمل رقم 3215 وقررت محكمة أسرة بنها حجزها للحكم بجلسة 16 مارس الجاري.