إيقاف بعض الخدمات في فودافون بسبب تغيير الساعة
لقاء الخميسي: تعرضت للتنمر في الطفولة.. وهذه نصيحتي للتغلب عليه
الأربعاء 17/أغسطس/2022 - 10:50 ص
بسمة خالد
بثت الفنانة لقاء الخميسي فيديو لها عبر موقع التواصل الاجتماعي وتبادل الصور والفيديوهات "انستجرام" تكشف فيه عن تعرضها للتنمر وكيفية التغلب عليه ونصائح خاصة للمتابعين للتغلب على التنمر.
كشفت لقاء عن تعرضها للتنمر في المدرسة بسبب وزنها الزائد، وقالت في بثها المباشر: "أنا كنت في الإعدادية بنوتة مقلبظة جدًا في مرحلة المراهقة، بالرغم من أني كنت بلعب رياضة، وكنت بلعب باتيناج واسكواش وتنس، والتخن اللي كنت فيه كان بسبب الهرمونات والتحول من طفلة إلى مراهقة".
وتابعت قائلة: "ساعات كتير أوي مكنتش مبسوطة بنفسي وبحس إني مهزوزة ومش واثقة في نفسي وخصوصًا أن فيه ناس كتير من صحابي في المدرسة كانوا بيهزروا معايا بطريقة مش ألطف حاجة، زي ايه دا دا انتي تخنتي كدا ليه، وأكيد هما مكنش قصدهم".
وأوضحت أن والدتها هي السبب في التغلب على التنمر وحبها لذاتها معبرةً: "وأنا كنت متصالحة مع نفسي جدًا علشان أمي كل يوم الصبح وأنا لابسة لبس المدرسة وتخينة كانت بتقولي إنتي قمر في سماه إنتي أميرة جميلة، وكل البنات اللي ربنا خلقهم أميرات جميلات، كل واحدة على حسب شكلها وجمالها وسحرها، ربنا خلقنا مختلفين ومن الاختلاف بيظهر الجمال".
نصائح لقاء الخميسي للمتابعين
وفي نهاية البث حرصت لقاء الخميسي على توجيه نصائح للأشخاص المعرضين للتنمر حيث قالت "أي حد بيتريق أو بيقول كلام مش كويس بيصعب عليا، علشان أنا ببقى متأكدة أنه جواه وجع ما بيحاول يخرجه نتيجة كلمة اتقالت له وهو صغير من أهله أو صحابه وجعته أوي أوي مش عارف يتخلص منها فبيطلعها على الآخر".
وأضافت قائلة: "وعشان الكلام ميأثرش فينا لازم يكون عندنا ثقة في النفس، وهتيجي من حبك لنفسك، ربنا خلقنا عشان بيحبنا عشان أنت رسول ربنا على الأرض، ربنا بيحبك جدًا زي ما أنت، قصير طويل تخين رفيع، وعشان أنت ترد الحب لربنا لازم تحب نفسك".
