زوجة تسأل: «بتعملوا إيه عشان ترضوا حماتكو؟».. ومعلقون يهاجمون

كتبت امرأة مشكلتها عبر موقع التواصل الاجتماعي "فيس بوك" تطلب النصيحة فيما يمكن أن تفعله لكسب ود ورضا حماتها، وجاءت التعليقات تمثل هجوما شديدًا على الحموات.

وقالت الزوجة في منشورها: "بنات بتعملوا ايه عشان ترضوا حماتكوا عشان أنا مش عارفة أرضيها ومش بيعجبها حاجة، أنا بقالي فترة عندي دور برد تقيل شوية، وحامل ولما نزلت النهاردة لقيت مواعين يومين مركونة متغسلتش عشان منزلتش وكانت كتيرة على ما خلصتها كان ضهري وجعني، وأخت جوزي كانت بتغسل الغسيل لأمها وأخواتها شباب وأنا خلصت وطلعت نمت كنت تعبانة، وجوزي مش عاجبه إزاي أسيب أخته بتغسل وأطلع أنام وهي شايلة عنك كتير ووابقي ساعديها طيب مهي بتخدم أخواتها".

وأضافت: "أنا مالي كفاية عليا شقتي وجوزي وبنزل كل يوم أغسل كوم مواعين قد كده، وأحيانا مبكونش واكلة تحت عشان أقول أغسل مكان أكلي وأنا بفكر أعزل بس أجبها إزاي، أنا همنع الأكل تحت عشان بيرموا كلام إني بنزل ألاقي الأكل جاهز طيب مهو غصب عني بسهر بالليل جمب جوزي شغله بالليل وبنام الصبح».

قالت ياسمين: «يعنى حامل وكمان مفيش تقدير، أرجع وأقولك العيب على جوزك، هو السبب في إنك ياترتاحي ياتتمرمطي، وهو راضي، وكمان مش عاجبه».

وعلقت سوسو: «يعني يحلفلكوا ع مصحف إن بلاش بيوت عيلة، بجد كلهم مشاكل وأرف العزلة أحسن ليكي وليهم، من بعيد لبعيد كده هتبقى الحياة ألطف بكتير».

وقالت شيماء: "اللي بيعمل ده ذوق ولله وربنا يجازي اللي بيعمل وبيساعد خير واللي مبيعملش ده مش إجباري ولا مفروض، سهلوا الدنيا ع بعض ياجماعة عشان ربنا يسهل طلوع روحكوا إن شاء الله».

بينما علقت كريمة: «متعمليش حاجة وإن شاالله ما عجبه وقوليلوا ده اللي عندي، واخبط دماغك في أقرب حيط، ده فضل مش فرض عليكى بس طالما بقى شايفه حق، عزلي».

وقالت نهال: "«لو عملتي إيه مش هتقدر أصلك خطفتي ابنها الشملول منها هي دي قصة الحموات».

وعلقت مريم: «اعطيهم بالجزمة، إيه قلة الأدب دي، إنتي مش جارية عندهم، الناس دي ما ينفعش معاهم الاحترام والله العظيم لازم تقفلهم عشان هما بيستعبطوا أنا مش متجوزة في بيت عيلة ولما بروح عندهم مش بشيل معلقة اللي بتتنازل بتفضل طول عمرها تتنازل وبياخدوها حق مكتسب».

كما قالت إيمان: «عزلي ومتعمليش حاجة ليهم طلما فيه شحطة تحت وبعدين إنتي مش ملزمة غير ببيتك».