«عمتو الحرباية».. فتاة تعرض مشكلتها مع أخت خطيبها وتُفاجئ بالهجوم عليها في التعليقات

نشرت إحدى الفتيات مشكلة خاصة بعائلة خطيبها على موقع التواصل الاجتماعي "فيسبوك"، حيث كانت تطلب الآراء والنصيحة من الأخريات، ولكنها تفاجئت بهجوم شديد من الفتيات في التعليقات على منشورها وبدلًا من حصولها على الدعم والتعاطف أصبحت هي المذنبة.

وكتبت الفتاة في منشورها: «انا كنت معزومه عند حماتى انا وأهلى المهم أنا كنت اعده دخلت اشرب مياه لقيت أخته بتقولى انتى بتتحركى براحتك كدة مفيش بربع جنيه احراج فانا اتحرجت قولتلها عادى باخد على البيت ما خطيبي ليا فيه اكتر منك وضحكت، راحت قالتلي ما تحترمى نفسك ده بيتنا وانتى ضيفه هنا قولتلها هنبدأ عمتو الحربايه وضحكت كل دة بهزر، راحت ماسكه فيه وضربنا بعض وبابا وحماتى وخطيبي أعدوا يخلصوا وماما تزعق مع اخواته والدنيا ولعت بعد الفطار والجيران خبطت ويخلصوا وكانت فضايح، بابا قاله الموضوع انتهى احنا اتشتمنا في بيتكم وحاجتك هتاخدها وخدنا بعض ونزلنا، خطيبي كلمنى وكلم اهلى هو ومامته واعتذروا واخته بتقول ان انا الى استفزتها وبابا مقفل دماغه بيقولى خلاص مينفعش عشان اخته بقوله كل واحد في حاله قالى لا دى اخته وربنا يرزقك بالاحسن اعمل ايه وابعد فعلا ولا اقنع بابا حلوها معايا يا بنات».

قالت إيمان: «العيله دي هي اللي ارتاحت منك انتي لأن عيب عليكي تدخلي بيت وانتي لسه علي البر ويكون دي ردودك انتي اللي زيك لا يعمر مع دول ولا غيرهم ربي نفسك وعلمي نفسك وخدي نصائح الكبير وبعد كده فكري في جواز لانك للاسف وابوكي ده المفروض الصح كان قام لطشك قلم وخلي ابو خطيبك يرد راخر دانتو عيله يعلم بحالها ربنا وطبعا ماترجعيش».

وعلقت فاطمة قائلة: «علي فكره أنتي مش سالكه ومستفزه هي آه غلطانه بس أنتي عقربه وسوسه اوي والآخر كنت بهزر».

وقالت مريم: «بصراحة هي بجاحة منك زيادة عن اللزوم ، وبأي حق تقولي خطيبك له اكتر منها انتي داخلة على طمع بقا، انا كنت ببقا في بيت حماتي واستأذن لو هاعمل اي حاجة او حتى ادخل اي مكان استأذنها الأول الله يرحمها يارب».

وعلقت مريهام: «معندكيش بربع جنيه خجل ولا ربايه لا وكمان كياده دي العيله دي ربنا بيحبها أن ربنا بعدها عنك كان زمانك عمللهم مشاكل بعد الجواز ربنا يغور امثالك عن حياتنا».

وعلقت سمر: «بس انتي برضه ردودك صعبه من اولها كدا خطيبي ليه في البيت اكتر منك وبعدين المفروض فعلا كنتي استاذنتي... دا من آداب الإسلام لانك فعلا ضيفه انتي خطيبته مش زوجته وهي غلطانه لأنها معرفتش تمسك لسانها بصوا انتوا كلكم غلطانين... والمفروض مامتك تفهمك ده».