حمو بيكا لـ هاني شاكر: «أنت وعيالك بتسمعوني فعايزني أغني برا مصر ليه؟!»

خرج مطرب المهرجانات حمو بيكا، في فيديو جديد له على حسابه الرسمي بموقع التواصل الاجتماعي «فيس بوك»، ليعلق على قرارات نقابة المهنة الموسيقية برئاسة نقيبها الفنان هاني شاكر ضده خلال الفترة الماضية.

وقال «حمو بيكا» خلال الفيديو: "سيبونا في حالنا بقا، بتقول أغني برا مصر ليه يعني؟ أنا مصري وعشت طول عمري هنا، هنغني في مصر ودي بلدنا، وكل اللي بيحصل ده مجرد موجة وهنرجع تاني، ودي خامس مرة ليا تحصلي مشكلة، أنا سعيت وكملت عشان معايا ربنا واللي معاه ربنا مبيخسرش".

وأضاف: "إحنا مش بنجبر الناس تسمع مهرجانات، اسمع اللي أنت عايزه، إحنا محدش بيدينا حاجة من جيبه، وأنا ماضي على أفلام بس واقفة بسبب النقابة، أنا لو خدت فرصتي كان زماني في حتة تانية".

وأوضح خلال الفيديو الذي بثه على صفحته الرسمية: "لو هما مستكترين علينا النعمة فربنا اللي بيديها لنا، ومحدش بيدينا حاجة من جيبه أو بيصرف علينا، وربنا اللي بيحاسب العباد، وهو وعياله بيسمعونا، - مشيرًا إلى هاني شاكر-، وبيسمعنا الدكاترة والمهندسين والضباط كله بيسمعنا".

وعن صوته علق «حمو بيكا» قائلًا:" أنا صوتي مش كروان، أنا راجل حابب المزيكا، وعارف أنا بعمل إيه كويس، ومغصبتش حد يسمعني، وأنا عندي شعبية كبيرة من الجماهير، أتمنع ليه من الغناء داخل بلدي".

وكان «هاني شاكر» قد أصدر بيانًا بمنع عدد من مطربي المهرجانات عن الغناء في مصر، منهم حمو بيكا، حسن شاكوش، عنبة، عادل شكل، أحمد موزة، كزبرة، حنجرة، وكوستا وسمارة، وغيرهم من مؤدي المهرجانات.

اقرأ أيضًا..

حمو بيكا يبهر جمهوره ببوست جديد: اخواتي وقرايبي بيقرولي وبيكتبولي اللي انا عايزه