بملعقة واحدة.. 6 فوائد للعسل تحدث في جسمك لن تصدقيها.. ما هي؟
من الدور بينادي صاحبه لكومبارس فاشلة.. القصة الكاملة لأزمة مها أحمد مع السقا وأمير كرارة
الأحد 16/مايو/2021 - 03:28 م
مها أحمد مع السقا وأمير كرارة
عمرو عادل
أثارت الفنانة مها أحمد حالة من الجدل بعد حديثها عن النجم أحمد السقا وأمير كرارة، وادعائها بأنهما قبلا الإساءة لنفسيهما على يد المخرج محمد سامي من أجل زوجته مي عمر خلال تصوير مسلسل «نسل الأغراب»، ودخلت والدة أحمد السقا وكذلك شقيقته على خط الأزمة.
حيث وجَّهت مها أحمد، رسالة شديدة اللهجة، وكتبت «مها» عبر صفحتها الرسمية على موقع «فيسبوك»: «عوضي على الله، دي الجملة اللي دايمًا بقولها لما أتصدم في أشخاص، الحكاية يا سادة نجمين عملوا مسلسل واتنجّمت عليهم بنوتة لسه ألف باء تمثيل وإديتهم على قفاهم، وركبت عليهم إلى أن أصبحت بطلة المسلسل وبطلة الدعاية للمسلسل، وهما راضيين رغم إن طول عمرهم مبيعملوش كده مع أي زميلة لهم أقربها أنا».
وقالت عن أحمد السقا: «النجم الأولاني بينى وبينه عيش وملح وزمالة، رشحت في مسلسل بطولته وكان بيقنعني بدور ولما وافقت بعتولي دور تاني معرفوش، دور متعملوش واحدة مبتدئة، المفروض إنه عارف قيمتي الفنية وعارف إني إضافة له، اتهرب مني وما وقفش جنبي وباعني رغم إن الكل عارف إنى زي أخته.. ندل».
وقالت عن أمير كرارة: «التاني كان في بداياته يتمنى يسلِّم عليَّا ويقولى يا أستاذة، نزلت من نفسي وقلتله مش هنشتغل مع بعض ما هي الحوجة مُرَّة، رد وقالي: الدور بينادي صاحبه طبعًا ما أحكلكوش قد إيه ندمت نفسى وعشت أسود أيام حياتى عياط واكتئاب وقلت: عوضي عليك يا رب».
واسترسلت: «تمر الأيام والاتنين يعملوا ويتجمعوا مع بعض في مسلسل واحد (على عينهم طبعا) ويمثلوا وحش قوى تمثيل الكفار وطلعوا كمان مبيقروش اللى بيمثلوه، وربنا يركب عليهم بنوتة سنة أولى تمثيل وخبرة ويتحول المسلسل والدعاية الدراما كاملة لصالحها وهما (مخدماتية للأستاذة)».
وقالت مها أحمد: «يمهل ولا يهمل، ابدأوا من جديد يا أوفر تمثيل ياللى مبتقروش يا كمبارس جنب النجمة. نصيحة بلاش تتشطروا على اللى كان بينكم وبينهم عيش وملح، بلاش تتشطروا على أساتذتكوا. عوضنا على الله، يارب ما تحوجنا لحد حتى ولو كان أقرب الناس لينا».
واختتمت: «بناءً على اللي حصل جالي اكتئاب وعيطت كتير جدًا، خلال تلك الفترة أنا تعبت وأخدت أدوية وما زلت باخد الأدوية لحد دلوقت، شيء طبيعي لما ألاقي فيها حاجة بها رد اعتبار ليا، هتكلم وأكتب على صفحتي، وأنا كتبت بصراحة شديدة، ولا بشمت في حد ولا عايزه، ولو عايزه أشمت هشمت في نفسي أني أحسن من ناس كتير وقاعدة في البيت، ربنا كارمني أن أعمالي بتتعرض على الشاشة، ولسه في حكايات كتير مع زملاء كتير هحكيها».
وبعد حديث مها أحمد لم تصمت فاطمة شقيقة النجم أحمد السقا فردت عبر حسابها الرسمي على موقع «فيس بوك»، قائلة: «الكلام ده موجه ليكِ يا أستاذة بدل ما تفضلى تمسحى ردى كل شوية.. أبهرتينى يا مها بأخلاقك العالية.. وبأنك افتكرتِ العيش والملح اللى كلتيه في البيت بتاع الفنان اللى مش عارفة تقولى اسمه بس عرفتى تقولى عليه (ندل)، اللى هو أحمد السقا، بس أنا بقولك قدام الناس: قطع لسان أي حد يقول عليه كده؛ لأنه راجل أكرمك ووقف جنبك أنتِ ومجدي بدل المرة ألف».
واستكملت شقيقة السقا: «أمير كرارة بردو راجل جدع ومحترم للي ما يعرفهوش في البوست بتاعك ده.. معرفش إيه الفرص اللى كانت عندك اللى كان يتمنى يشتغل معاكِ فيها زمان بس هو أي حد يتمنى يشتغل معاه دلوقتى أكيد.. وكلمة الدور بينادي صاحبه دى بتاعة أفلام.. ما بتتقالش في الحقيقة.. كفايا دراما وتشويه للناس».
واختتمت شقيقة السقا في ردها على مها أحمد: «وبعدين هما كممثلين مش مُطالبين يقفوا جنبك ولا يجيبولك أدوار على فكرة.. دى رؤية مخرج وناس بتوع كاستنج.. الحقيقة أنا مش عارفة أنتِ عايزه إيه؟ أنا مش شايفة بعد العِشْرة الطويلة اللى أنتِ قولتِ عليها غير كمية الحقد والسواد والشماتة اللى كانوا متداريين ورا ابتسامة كدابة، معرفش أنتِ إزاى كنتِ بتدخلى بيوتنا الصراحة وأنتِ ست وحشة كده.. أنا نسيت أقولك..السب والتطاول ده بيدل على الأصل.. وإحنا بقى ولاد ناس مع إننا عندنا كلام كتير أوى يتقال».
وردت نادية السقا، والدة الفنان أحمد السقا، على منشور الفنانة مها أحمد وكتبت عبر صفحتها الشخصية بموقع «فيسبوك»: «على الأصل دور كومبارس فاشلة تتطاول وتسب فنانين كبار، وتعلق فشلها عليهم، تبحث عن الشهرة بطريقة بذيئة مهما حاولتِ يا كومبارس ليس لكِ مكان بين الفنانين المحترمين، وإن طلع العيب من أهل العيب ما يبقاش عيب».
