«اللى مني باعونى».. منة تخطف زوج شقيقتها بـ«ورقة عرفي»

أختان لأب واحد فرقهما الأيام، أو لعلها غيرة إحداهما من الأخرى هي السبب، ليجتمعا في النهاية أمام محكمة الأسرة على زوج واحد، تلك هى التفاصيل المختصرة للشقيقتين « أسماء ومنة».

أسماء تتهم شقيقتها بتدمير حياتها

أسماء الأخت الكبرى والزوجة الأولى لحسن، تزوجته منذ 7 سنوات، لتعيش معه كل ألوان الحب والفرحة، ولكنها تغيرات القدر بعدما أصبحت أختها جزأ من حياتها وجاءت لتعيش معها بمنزل واحد « دي مينفعش يتقال عليها أخت، دمرت حياتي، طول عمرها بتكرهني، ومن أول يوم جواز ليا وهي مقررة تخرب بيتي، سنين وهي بتحاول تجر جوزي وتوقعه في الغلط، وتزوره في البيت وهو لوحده، ورغم إنه كان وقتها بيتصل بيا ويعرفني بس قدرت بعد فترة تخلينا أعداء».

أختي باعتنى وتزوجت عرفيا

بدأت أسماء بالبكاء وهي تروي أفعال أختها، فقد كانت تقسم لها أغلظ الأيمان أن زوجها يغازلها، ورغم ثقتها الكبيرة بزوجها، إلا أن الشيطان دخل بينهما وأصبحا في خلاف دائم « وبعد كل ده جاية تقولي إنها اتجوزت جوزي بعقد عرفي، وفيه علاقة بينهم، وقالتلي أنا عارفة إنه حرام شرعا بس جوزك فهمني إنه طلقك من سنة، وخاف يقولك، حسيت نفسي تايهة ومش عارفه حاجة، أصدقها ولا أكذبها، بس أنا متأكد إن فيه حاجة غلط بينهم، فقررت أطلب الطلاق رسمي، عشان أنقذ نفسي، بس هو رفض واتمسك بيا، وعشان كده لجأت لمحكمة الأسرة».

منة ترد: المفروض تقف جنبي

أما «منة» فدافعت عن نفسها، وأكدت أنها وقعت في الفخ، وأن زوج أختها أقسم أنه طلقها، وأنه يحبها بصدق: لتضيف: «اتجوزنا بعقد عرفي عشان الناس متتكلمش علينا، وكل حاجة حصلت بينا كانت في الحلال، أنا عارفة إني غلطت، وكان قدامي مليون راجل غير طليق أختي، بس أنا حبيته، ودلوقتي أنا واقفة قدام محكمة الأسرة عشان أثبت إنه جوزي، ومعملتش حاجة حرام، والأولى بأختى إنها تتغاضى عن غلطي وتقف جنبي».

الزوج يبرئ نفسه من المسئولية

وردًا على ذلك أكد «حسن» الزوج على أنه لم يطلق زوجته «أسماء»، فهو يحبها ولا يمكنه التخلي عنها، وبخصوص «منة» فقد أنكر علاقتهما وأصر على كذبها:«دي مريضة نفسية، هو أنا مجنون أشيل نفسي ذنب وقضية».