سؤال وجواب.. ازاي تحصلي على شقة في مبادرة التمويل العقاري الجديدة

خبير اقتصادي يجيب على أسئلة الناس الخبير الاقتصادي محمد نجم يجيب على أهم الأسئلة التي تدور في أذهان الراغبين في الحصول على شقة ضمن مبادرة التمويل العقاري 2021:
.
س1: محدود الدخل فى مصر ازاي يقدر يوفر مقدم 100 أو 150 ألف جنيه؟ ده مبلغ كبير جدا، إيه الحل؟

ج1: المقدم المطلوب من محدود الدخل أقل من كدة بكتير وده هشرحه تحت، بس السؤال الصح: قدرتك على السداد كم؟ يعني ازاي البنك يحدد إن أنت آخرك شقة سعرها كذا؟
الخطوات:
الخطوة الاولى: الحد الأدنى لراتب محدود الدخل البنوك تقول: إن صافي دخلك الشهري لا يزيد عن 4400 جنيه بس مقالتش إنه لازم يكون 4400، يعني ممكن يبقي 4200 أو 3500 عادي، المهم مينزلش تحت 2800، ليه؟ عشان تحت المستوى ده مش هتقدر تدفع القسط بحده الأدنى في مبادرة الـ30 سنة، الحسابات دى أنا اللى عملتها، هي حسبة رقمية بحتة تقدر تعملها لوحدك لو عندك معطيات كافية بتدخل بيانات بتطلعلك نتايج وشكرا.

يبقي المرتب لازم يكون بين 2800 إلى 4400 شهريا، ولو أنت فى النطاق ده يبقي أنت فى نظر البنك قادر على التقسيط ضمن التمويل العقاري على 30 سنة، فئة محدودي الدخل.

الخطوة الثانية: تطبيق معادلة الحد الأقصى الآمن للأقساط الشهرية بناء على تحديد مستوى الدخل نحدد أقصى قيمة للقسط الشهري، وبما أن البنك المركزي أعلن سابقا عن أن القسط مينفعش يعدي 40% من مرتبك، من هنا قدرت أحط الحد الأدنى 2800 جنيه شهريا راتب.

اقرأ أيضا..
مصطفى بدران لـ"هير نيوز": مبادرة التمويل العقاري تدعم محدودي الدخل

الخطوة الثالثة: تحديد الحد الأقصى للوحدة السكنية وفقا لرقم الدخل ونسبة القسط نقدر نحدد أقصى سعر للوحدة السكنية اللي تقدر تشتريها، أقصى سعر للشقة = 350 ألف جنيه، وفقا لنائب محافظ البنك المركزي جمال نجم، ممكن أقل لكن مينفعش أكثر؛ لأن أنت آخرك 40% من دخلك اللي هو 2800 جنيه.
الخطوة الرابعة: تحديد المقدم بناء على سعر الشقة نقدر دلوقتى نحدد المقدم، قبل كدة كان المفروض المقدم = 20% اللى هم = 70 ألف جنيه، صح، البنك المركزي هينزل بالمقدم لـ15% اللى هم = 52 ألف جنيه.

طب افرض فيه حد مش معاه المبلغ ده؟ تقدر تدفع المقدم على 3 سنين بدعم من صندوق الإسكان الاجتماعي. الخطوة الأخيرة: تحديد القسط الشهري يبقي بعد تسوية المقدم، هيتبقي عليك 298 ألف جنيه قيمة التمويل البنكي، القسط هيبقي 1200 جنيه في الشهر على 30 سنة 3% فائدة متناقصة.. ألف مبروك.

س2: أروح فين وأجي منين؟

ج2: أي حد عايز يعرف يروح فين عشان ياخد تمويل عقاري من أماكن محترمة وموثوقة ومرخصة من الهيئة العامة للرقابة المالية والبنك المركزي اضغط هنا  ستجد كل التفاصيل الخاصة بالشركات اللى تعمل بنظام التمويل العقاري.