كشف الإعلامي باسم يوسف عن موقف جمعه بالزعيم عادل إمام، من خلال فيديو عبر حسابه الرسمي على موقع انستجرام، أوضح من خلاله عن حبه للزعيم عادل إمام، وقيمته بالنسبة للفن ولمصر، على مدى مشوار فني امتد ل 60 عاما.

شارك باسم يوسف فيديو على حسابه الرسمي بموقع انستجرام قال فيه: " بمناسبة تكريم الزعيم عادل إمام في مهرجان جوي أواردز وبمناسبة برضه خبر اعتزاله الفن عندي قصة صغيرة عايز أحكيها مع الأستاذ عادل إمام، أنا أول مرة قابلت الأستاذ عادل إمام كان لما كنت كسبت بمسابقة الأكثر تأثيرًا في 2012 وكنت ساعتها في سي بي سي وعملولي حفلة وكان في ناس كتير وقابلت أستاذ عادل وكان لطيف جدًا وقابلت كمان سمير غانم الله يرحمه وكانت ليلة جميلة جدًا".

وتابع باسم يوسف: "أبويا وأمي الله يرحمهما كانا متواجدين وأنا طول عمري بتفرج على عادل إمام وسمير غانم.. إزاي بقي الناس دي قدامك وبتتكلم معاهم وقاعدين معاك ومبسوطين بيتفرجوا على البرنامج وكان عادل إمام قاعد محدش بيتكلم الراجل كان كاريزما رهيبة ودمه خفيف جدًا وجت الحلقة اللي أنا اتمنعت بعديها من سي بي سي وكنت بصور حلقة يوم الأربعاء وتاني يوم الخميس سافرت عشان أحضر الفورمولا 1 في أبو ظبي".

وأضاف: "وفجأة لقيت تليفونى بيرن أستاذ عادل إمام قالي إيه يا باسم اللي بيحصل ده ولقيته بيزعقلي وقالي البرنامج فين؟ الحلقة ما تذاعتش، قلت له والله أنا سلمت الحلقة وهو كان متضايق إن البرنامج إزاي مايتذعش وبعدها عرفت إن الحلقة اتمنعت والبيان اللي طلع وبعدها لقيت أخويا بيكلمني قولتله بقولك إيه عادل إمام لسه مهزقني أنا مش ناقص، ونسينا البرنامج وقعدنا أنا وأخويا نتكلم على مكالمة عادل إمام".

واختتم باسم يوسف حديثه موجهًا التحية للزعيم عادل إمام: "أستاذ عادل ربنا يكرمك ويطول في عمرك ويديك الصحة أنت كنت جزء كبير من تاريخ مصر وبسبب أفلامك ناس كتير عارفين مصر من خلالك أنت ممكن تختلف مع عادل إمام تحب فنه متحبوش لكن هو تاريخ وأنت ممكن تحب التاريخ وتكره التاريخ وهفضل طول عمري فاكر المكالمة دي والتهزيقة دي اللي اتعملت بحب طبعًا".

وكان المخرج رامي إمام أعلن خلال تواجده في حفل joy awards الذي أقيم مساء أمس على الأراضي السعودية ببوليفارد الرياض، ووسط تواجد محلي وعالمي، اعتزال والده الفنان الكبير عادل إمام الفن نهائياً.