وفاة شابة بعد أيام من ولادة طفلها تثير ضجة والسبب صادم

أثار خبر وفاة امرأة شابة بعد ولادة طفلها الثاني بأيام حزنا شديدا وجدلا بين رواد مواقع التواصل الاجتماعي "فيسبوك"، حيث صدم الخبر الجميع ولم يستوعبه أحد نظرا لأنها لم تعاني من أي مشاكل صحية ولا هناك سبب واضح للوفاة.

تداول رواد السوشيال ميديا منشور نشرته كارولين، الأم الشابة، قبل وفاتها بساعات، حيث كتبت على صفحتها الشخصية بموقع "فيسبوك": "في آخر كل يوم أنا أم مقصرة وصديقة مشغولة وأخت بعيدة وموظفة مش شاطرة وزوجة عصبية وبنت عاقة ومبنعجبش حد وياريت حتى بنلاقي وقت لنفسنا".

ونشر الكثير من السيدات والأمهات الأخريات صورة كارولين وهي عروس شابة في غاية الجمال مع صورة لكلماتها الأخيرة، مع تعليقات حزينة وتوقعات منهم باحتمالية وفاتها بسبب الحزن أو الضغوط أو الإصابة باكتئاب ما بعد الولادة.

وكتبت مارينا: «ربنا ينيح روحك ويعوضك عن كل الم مريتي بيه كارولين كتبت البوست وبعدها بساعات سافرت السما.. ربنا يصبر جوزك ويعول أطفالك اللي لسه ماشفوش الدنيا».

وعلقت مريم: «بمناسبة البوست المنتشر ده للي مايعرفش للاسف البنت اتوفت تاني يوم بعد ماكتبت البوست ده ولسه والده ، انا بس عايزه اقول ان الحاجة اللي بتعملها بمجهود معين اضرب المجهود ده 10 أضعاف لو بتعملها ومعاك طفل.. بين تشتت انتباهك مليون مرة، طلبات بلا هدف، احتياجاته أولوية ف وانت بدأت خلاص تركز في اللي بتعمله وتفهم الزتونة أو بتحاول تنجز اي حاجه، هوب ماما عايز بي بي.. في ميم مشهور بين الأمهات إنها بتفضل تخطط هعمل كذا وكذا لما ينام فالاخر هو ينام وهي تتنح باصة للسقف.. ده منطقي جدًا لإن الطفل عنده قدرة رهيبة ميروحش فالنوم غير بعد ما يستهلك آخر ذرة طاقة لجهازك العصبي وآخر ذرة صبر وقبل لحظة من ما تفكري تطبقي اي فكره نفسك تعمليها في بالك ساعتها حتى لو كانت كباية قهوه.. فهو ينام وانتي مُستهلكة ومش فاهمة المفروض تنامي انتي كمان ولا تشوفي حياتك ولا تاكلي في هدوء ولا تتعلمي حاجة وتسقُطي فجأة وتصحي تكملي دوامة اليوم!!".

وأضافت: "جزء كبير من عصبية الأمهات بيبقى بسبب أن عليها إنجاز العديد من المهمات و فى نفس الوقت بتحاول لو تعرف تخلق لنفسها لو وقت قصير جداً تحس فيه أن بـ امكانها فعل أى شئ تحبه دون توتر و سرعة و من أكبر المشاكل اللى بتقابل غالبية الأمهات هى إحساسها بأنها معرضه للإنتقاد و الإتهام بالتقصير دايما بيتم إلقاء اللوم على الأم بأن هى اللى بتفشل فى تقويم أطفالها رغم أن الأم كل وقتها ومجهودها و تفكيرها فى صلاح أولادها.. الأمهات لا يأخذون إستراحة أو فاصل هم دائما ملك لـ أبنائهم فـ رفقاً بالأمهات .. رفقا بكل ست. ارحمو بعض.. خليكو حنينين على اللي معاكو.. عشان اه الزعل طلع بيموت عادي جدا.. حسو ببعض قبل فوات الاوان».

وكتب مينا: «امبارح بالليل لقيت صورتها قدامي ولقيت مكتوب عليها إنها اتنيحت وسافرت السما .. بصيت في الصورة أكتر من مرة علشان اتأكد من الخبر الصادم .. إسمها كارولين وأعرفها من أكتر من ٧ سنين .. بنت مبهجة وطيبة .. دخلت علي البروفايل تاني علشان افهم ايه اللي حصل وإزاي .. لقيتها كاتبه بوست واضح فيه إنها مضغوطة .. ولدت من عشر أيام الطفل التاني ليها .. رحيلها مفاجئ بشكل يخض .. وكلامها قبل ما تمشي يخض أكتر .. ربنا ينيح روحك يا كارولين .. أكيد السما أحن علي قلبك .. صلوا ل اهلها وجوزها واطفالها ربنا يسندهم .. الدنيا مش مستاهلة نجرح ونضايق بعض ..محدش عارف مين هيمشي قبل مين».