«قعدة ستات» تكشف حيل المرأة المصرية في مواجهة ارتفاع أسعار اللحمة قبل العيد

تستطيع المرأة المصرية التعايش في كل الظروف الاقتصادية فهي عمود المنزل والعقلية المدبرة التي تنجح دائما في سد احتياجات أسرتها، حيث كشفت أحاديث النساء في إحدى وسائل المواصلات قبل حلول عيد الأضحى قدرة المرأة المصرية على تدبير منزلها وتحدي الغلاء.

وكانت هناك مجموعة من النساء يتحدثن في إحدى وسائل المواصلات العامة عن احتياجات المنزل قبل حلول عيد الأضحى، خاصة مع ارتفاع أسعار اللحوم وعدم قدرة الكثير من الأزواج على شراء كميات من اللحوم للأضحية مثل كل عام.

قالت أم حسين: «إحنا المصريات ستات شطار أووي، وعمر الغلاء ما يوقفنا أبدًا عن احتفالاتنا وبهجتنا وفرحتنا بدخول العيد، اللحمة غالية أه بس في بدائل كتير، أنا عن نفسي هشتري لحوم من المجمعات الإستهلاكية، ما هي لحمة بردوا، بس اتفقت مع جزار قريبي يحوش ليا ماسورة وعظم من الذبيحة، هخدهم وأحطهم على الشوربة وهتعطيني شوربة أحلى من البلدي وهسقي بها الفتة والرقائق وكل اللي اتعودت أعمله كل سنة في العيد».

بينما علقت الحاجة صفية، قائلة: « ياما عدى علينا أيام ولا عمرنا استسلمنا، إحنا بقى الحمد لله جزار حارتنا في المنيب، لما عرف إن اللحمة هتغلى من شهرين، راح قال للناس اللي عايز لحمة ممكن نحوش عنده الفلوس لغاية العيد، وفعلًا كل تسويقة الستات تسوقها تروح وتديله الفايض منها، لغاية ما حوشت معه ثمن 2.5 كيلو لحمة، واتفق معنا الأسبوع ده إنه هيجيب الدبايح طازجة ويعطينا يوم العيد كل واحد نصيبه، وراجع مع الكل مين دافع كام وله كام لحمة، وأهي هتقضى ومستورة والحمد لله وهنقضي أول يوم وهنملى الحلة شوربة علشان الفتة والرقاق».

وقالت سنية: «أنا كمان هجيب لحمة من الجمعية وهضبطها بالتوابل والمرقة، وربيت 5 فرخات وهدبحهم على العيد، وبكدة راضينا العيال ومحرمنهمش من حاجة».

ومن جانبها قالت أم كريم:« أنا وصحباتي اتفقنا مع واحدة بتبيع ديوك رومي، تخيلوا الكيلو على 150 جنيه، دفعنا العربون ربط كلام وفي ليلة العيد هنأخد منها ديك رومي وزنه حوالي 5 كيلو بسعر 750 جنيه وهنقسمه على بعض».

وأضافت: «العيال فرحانة لأننا قلنا لهم هنشويه ونعمل حفلة شواء زي اللي بتيجي في التليفزيون، وهنجيب كيلو لحمة بردوا بـ 350 جنيهًا يبقى كلنا وشبعنا وفرحنا العيال وكل واحدة فينا إحنا الثلاثة مصرفناش أكتر من 600 جنيه، في كيلو ونص ديك رومي وكيلو لحمة بلدي».

وقالت سيدة أخرى عن فكرتها في لحوم الأضحية:« في حارتنا اشتركنا كل 5 في خروف وحسب وزنه، إحنا اختارنا خروف تمنه 10 آلاف جنيه، كل واحد فينا نصيبه 13 كيلو، وهندفع حوالي 2300 جنيه بثمن الجزار اللي هيدبح، واتفقنا كلنا لأننا من منطقة واحدة هنحط مع بعض كل واحد 7 كيلو هنوزعهم مع بعض على المحتاجين، والباقي لينا ولحبايبنا».

وعلق آخرون على حديثها من بعض المناطق الشعبية، قائلين إن بعض الخراف المعروضة للبيع في منطقتهم بسعر 4500 جنيه، مما جعل أحد الركاب يعلق: «يابلاش نتشارك في خروف مش لازم نضحي بس نأكل عيالنا».