تصدرت الفنانة سمية الخشاب تريند "تويتر" بعد نشرها تغريدة تفيد تلقيها مشاكل المتابعين لمساعدتهم في حلها، وانهالت عليها التعليقات.

 ومن بينها مشكلة لأحد المتابعين والذي كتب: "عايزين يخطبولي عشان أنا الوحيد لا أخ ولا أخت وعاملينلي صداع بسبب الحوار وأنا مش عايز لا دلوقتي ولا بعدين لأن تقريبا كده اتعقدت من سوابق علاقات الطرف الواحد بتاعتي".

رد سمية الخشاب

وعلقت سمية قائلة: "جواز إيه يا بني وهبل إيه مشكله الأجيال القديمة إنهم فاكرين الجواز ده إنجاز حياتي، بالرغم من إنه مسئولية زيادة ومصاريف زيادة في ظل ظروف مهببه، ده غير إن دي حاجة متميزش الإنسان بالعكس ده القطط والكلاب في الشارع بتتجوز، بجد بتعب من العقلية البدائية دي واتعلمت الموضوع ده متأخر أوي".

آراء المتابعين

توالت التعليقات بين مؤيد ومعارض فكتبت رضوى: " والله يا فنانة بأيدك في نفس الرأي ولسه قايلة للست الوالدة إني خلاص أشتغل وأحاول أوفر فرصة عمل برا مفيش أي إنجاز في الجواز متقلقيش إحنا عارفين كل حاجة".

وعلق يوسف :"حتى الفطرة اللي ربنا خلق الناس عليها عاوزين تشوهوها ؟!".

وكتب عبد الله : " الحقيقة الجواز استقرار نفسي كبير حد جمبك في كل حالاتك بيكمل حياتك كفاية القعدة والرغي والضحك المسئولية كده كده موجودة والمصاريف بتزيد بالطبيعة وكله برزقه".

راني أسعد قال:" يا شيخة شجعينا على الزواج".

لترد سمية :" شجع جيبك يا حبيبي، البنت مش تتعلم وتكفر في الجامعة وأبوها وأمها يطفحوا فيها الدم وتاخدها تقعدها في البيت تخدمك، اعمل فلوس كويسة تعيشها في مستوى زي بيت أبوها أو أحسن واديها حريتها في إنها تشتغل ويبقي ليها دور في المجتمع، لما يبقوا كل الرجالة بالعقلية دي هبقى أشجع على الجواز".

وأضافت : "ملاحظة إن بنات الجيل الجديد طالعين واعيين وعارفين هما عايزين إيه بيذاكروا وبياخدوا شهادة عشان يعتمدوا على نفسهم لحد ما يلاقوا حد بعقلية  طبيعية يقدروا يرتبطوا بيه يا ما بلاش أصلا هيعرفوا ينتجوا ومش يضيعوا سنين دراسة عشان تتمحي شخصيتهم ويقعدوا يخدموا شخص وخلاص، بجد فخورة".

وتابعت:"مترتبطيش ومتتجوزيش إلا لما تلاقي حد يفخر بيكي أو بدراستك أو بموهبتك ويسيبك تشتغلي وتعملي فلوس خاصة بيكي بدل ما تخدمي ويرمي مصروف، يا أما تقعدي في بيت أبوكي معززة مكرمة، محدش يطلع من بيت أهله إلا لمكان أحسن مهما كانت درجة الحب مبتأكلش عيش وبتمحي شخصيتك ودراستك وتعب أهلك سنين كتير".

آخر أعمال سمية الخشاب

عادت سمية الخشاب للمسرح بعد غياب سنوات من خلال مسرحية كازينو بديعة، وشارك في المسرحية كل من : علاء زينهم، ادوارد، أحمد فتحي، علاء مرسي، طارق الابياري، ايمي طلعت زكريا، ألحان وموسيقى هيثم الخمسي، وديكور حازم شبل، وملابس مروة عودة، ويشرف على المونولوجات حسن إش إش، تأليف أحمد الإبياري، وإخراج طارق الابياري.

ونقدم لكم من خلال موقع هير نيوز، أخبار وتقارير، صاحبة المعالى، منوعات، فن وثقافة، كلام ستات، بنات، هير فاشون، حوادث، رياضة، صحتك، مال وأعمال، توك شو، مقالات، دنيا ودين.

أقرأ أيضا ..

سمية الخشاب تضع إيلون ماسك في موقف مُحرج