فن وثقافة

ياسمين عز تنصح الزوجات قبل 2023:« احكي أسرارك لجوزك لأنه الفرعون الكبير»

السبت 31/ديسمبر/2022 - 11:31 م

نور أحمد

حرصت الإعلامية ياسمين عز، على تقديم عدد من النصائح للزوجات والسيدات وذلك بشأن التعامل مع أزواجهن بمناسبة احتفالات رأس السنة 2023.

وقالت ياسمين عز في تصريحات عبر برنامجها "كلام الناس" المذاع عبر فضائية MBCمصر: إن هناك سنة كاملة مرت على تقديمها للبرنامج، مؤكدة على أنها ستعمل على تقديم مواضيع جديدة في العام الجديد.

وأضافت :" بقول للزوجات متبقيش زنانة ولا فتانة ومتخليش سيرتكم أنتي وجوزك لبانة والحاجة تطلبيها مرة واحدة فقط من جوزك، واللي بينك وبين جوزك ميطلعش برا حتى لو لـ مامتك، ولكن اللي بينك وبين العالم قوليه لـ جوزك لأنه الفرعون الكبير".

وتابعت :" إياكي ينادي عليكي ومترديش أو تكونوا متخانقين وتقومي سايباه وداخلة الأوضة ورازعة الباب في وشه لأنه غير مقبول، وبدل ما تلعبي في هدوم جوزك وتفتشيها حطي له بونبوناية أو ورقة فيها كلام حلو".

وأضافت الإعلامية ياسمين عز :" تخيلي تروحي لـ جوزك وتحطيله في جيبك ورقة فيها طلبات ويلاقي كتباله مش محتاجين أي حاجة غير حسك في الدنيا مش متخيلة كم الأدرينالين اللي هيشع من وشه، مش بعيد يجبلك كل السوبر ماركت وهو جاي من البيت".

وتابعت ياسمين عز نصائحها وقالت :" بلاش تسأليه وهو نازل أنت رايح فين، الجملة دي لغوها، هيروح فين يعني؟ حسسيه أنك واثقة فيه وعنده مساحة شخصية ومش متراقب، وألعبي دور الأم في حياته وأدعي له دعوة حلوة، ربنا يخليك ويفتحها في وشك ويكفيك شر الناس المؤذية وربنا ياخد من الناس ويديك".

وأردفت :" ولو حصلت له حاجة حلوة عقله لا إراديا هيترجمها أنه بفضل دعوتك وهيتبارك بيكي، ولو اتخانقتكم سيبيه يزعق ومترديش والتزمي الصمت حطي نفسك على وضع الطيران لأن قلب الراجل مفيش أطيب منه".

اكسبي حماتك

واستطردت :" لازم تكسبي حماتك وأخته، ودايما تصلحي علاقتك بيهم؛ لأنهم هيكونوا عون ليكي ويدافعوا عنك، خلي جوزك ودنه تسمع كلام حلو وكلامك يكون حاضر وأوامرك يا حبيبي وشكرًا، لأن حاضر بتريح وشكرا بتحسسيه بالتقدير والستات اللي بيقولوا شكرا هينقرضوا، وخليكي متجددة ودلعيه وغازليه بالكلام، ويبقى طالع أمير وراجع وزير بفضلك، ولما يقولك بلاش تكلمي حد تقولي له علم وينفذ لأنه عارف مصلحتك".

واضافت ياسمين عز:" جوزك بينشن على الناموسة أحسن من أي لاعب جولف، ونصايحي دي هدية جوجل نفسه مش هيديهالك مش موجودة غير من الكتب اللي اتعلمت منها، الصوت الشتوي اللي نسيتيه بعد ما اتجوزتي، عايزاكي تستخدميه 24 ساعة والعيون النعسانة وضيقي عينيكي عشان يحس أنك بريئة".

واختتمت:" لأننا لو جمعنا بين الصوت الشتوي والعيون التشوية يا الله هتكون حياة فوق السعادة، الست ماجدة الرومي قالتله عيناك ليالي صيفية، هو الصيف وأنتي الشتا، لأن الراجل راجل لازم يكون صيفي وخشونة، إنما أنتي شتوي ودافيه، إنتي مصرية ونفرتيتي كليوباترا وفرعونة، وهو فرعون الكبير".