فن وثقافة

ياسمين عز: امسكي في جوزك الفرعون ولو راح منك مش هيرجع

السبت 24/ديسمبر/2022 - 07:41 م

ياسمين عز

نور أحمد

عادت الإعلامية ياسمين عز من جديد لتوجيه نصائح جديدة للسيدات من أجل الحفاظ على أزواجهن، وكيفية التعامل مع صديقاتهن.

وقالت ياسمين عز في تصريحات تلفزيونية عبر برنامجها "كلام الناس" المذاع عبر فضائية MBC مصر: "علمونا زمان إن الوقاية خير من العلاج، صاحبتي على عيني وعلى راسي، إلا جوزي، اتكلمي معاها عن الشوبينج أو مدرسة أولادك في المدرسة أو السوبر ماركت، إلا جوزك".

وأضافت: "امسكي جوزك الفرعون بايديكي، جوزك لو اتساب مش هيتجاب تاني، وبلاش تتريقي عليا لما انصحك وأقولك صاحبتك هتسرقه منك".

وأضافت ياسمين عز في تصريحاتها: "إيه موضة تحكي لصاحبتك أسرارك دي؟ أنتوا بتدعوا لدين جديد؟ حرصي على جوزك وأعملي الصح معاه وحاوطي عليه ولو مزنوقة في كلمتين فضفضي له لأنه هيهز راسه وهينسى وبلاش تثقي في صحباتك".

وأردفت ياسمين عز: "كلامي لكل البنات وأي واحدة صاحبتها سرقت جوزها منها ومش بخصص حد معين، وبقولك اشغلي نفسك بجوزك ومتقوليش أسرارك برا".

وتابعت: "صاحبتك اللي بنت أصول ولها كبير وعندها أب يقطم رقبتها ميتخافش منها ودي استثناء لأنها هتخاف إنما فيه صاحبات تانيين بتكلم عنهم".

وأكملت ياسمين عز تحذيرها وقالت: "بلاش الثقة المفرطة في صديقاتك وأنا حذرتكم وقولت لك اعملي حدود للصداقة مع الكل وحياتك مع جوزك متكونش مشاع للجميع، وبقول كدا بناءً على الدين لأن مينفعش حد يختلي بحد وأنتوا بتكئبوني لأني مش بنظر عليكي وشوفنا أنه بيحصل أهو، ولازم تعملي الصح مع جوزك".

اكسبي جوزك

ولم تكن تلك هي المرة الأولى التي تنصح فيها ياسمين عز السيدات، وتوجه لهم ارشادات للتعامل مع الزوج، فسبق وقالت :" "إن مفاتيح الرجل 3 حاجات، وهم أمه وأخته وودنه، أمه، إنتي عارفه حماتك، وهترجعهولك، وأخته إنتي عارفة التعامل معها يكون إزاي، وبالنسبة لودنه فهو عايز يسمع كلام حلو، هيشوفك ست الكل ومحور الكون".

وفي حالة أن قرر الزوج الزواج على زوجته قالت ياسمين عز :" لو جوزك اتجوز عليكي ورجع واعتذر، يا أهلا بيه والله يخليه، مفيش كلمة طلاق، إحنا بنصلح البيت، وبنسامح الراجل اللي غلط واعتذر، عشان نحافظ على البيت".

وأردفت: "الراجل غلبان وغلط ورجع لصوابه والعتاب بعدين، متبقاش هي قاعدة رجلها في الشمس وأنتي وشك يكون قد اللقمة وتتمنعي عن الرجوع".