توك شو

درة ترد على اتهام دخولها الفن بسبب جمالها: «ظلم لموهبتي»

الجمعة 28/أكتوبر/2022 - 12:50 م

درة في حبر سري

بسمة خالد

ردت الفنانة درة علي الأقاويل التي تتهمها بطغيان جمالها علي موهبتها، وأنها دخلت عالم التمثيل بسبب جمالها فقط، وذلك خلال حلولها ضيفة ببرنامج "حبل سري" علي فضائية "القاهرة والناس"، لتؤكد أن كل هذه الأقاويل ظلم لها ولموهبتها.

أنا تواجدت في الفن لما مثلت

قالت الفنانة درة مستنكرة هذه الأقاويل: "مش حقيقي، انا اتواجدت في الفن لما مثلت، وبدأت أول حاجة كان اوديشن مع يوسف شاهين، وانا لو قدام الكاميرا ماليش فيها مش هيجبني، واشتغلت مع وحيد حامد في الأولة في الغرام وهو اللي رشحني، وكان دور بنت شعبية مع اني مبقاليش كتير نازلة مصر، وأنا مبعرفش اتكلم عن نفسي وبحس إن الكلام ده في ظلم، لأنهم بيصنفوا إن الممثلة دي جميلة يبقى مش بتمثل حلو، وزمان في أفلام أبيض وأسود كلهم شكلهم حلو، وأنا بحب الإطلالات الحلوة في المهرجانات لكن في أدواري مبعتمدش على ده".

السوشيال ميديا من اسوأ الحاجات اللي حصلت

واسترسلت درة كلامها: "ومشاهدي في سجن النسا طلعت بـ ميك اب، وفيلم جدران لابسة لبس واحد طول الفيلم، وفيلم الكاهن كان في بهدلة واكشن، لكن هما عايزين يربطوا ده بحاجات محفوظة واعتمدوا ان ده حاجة مسلم بيها، والسوشيال ميديا من اسوء الحاجات اللي حصلت في زماننا وانا بشوف ناس كتير بتحبني، وهما دول اللي بيقولولي بنحبك، وانا لو مكنتش كده مكنش حد هيحفظ ادواري".

وتابعت كلامها عن أحب الأعمال لقلبها: "أكتر دور كان وش السعد عليا اللي هو الأولة في الغرام، مع هاني سلامة وبحب اشتغل معاه، وعملت معاه بين السما والأرض ونصيبي وقسمتك وبنعرف نشتغل مع بعض، ومسلسل العار قدمني للبيوت، وابويا الله يرحمه كان بيحبه، وأول مسلسل عملته في تونس اسمه حسبات وعقبات، والتونسي لغة حلوة وبنحاول نوصله للناس من خلالنا.. وبعدين سجن النسا وكذا حاجة تاني".

واختتمت درة كلامها: "أنا بقيت اترعب من البرامج والصحافة إن ميوصلوش كلامي صح، وانا عارفة ان بعد الحلقة هياخدوا كلمتين مانشيت ليا".