"شيرين تعمل اللي هي عاوزاه".. أبرز تصريحات دنيا سمير غانم في راديو إنرجي

بعد انتظار كبير من الجمهور حلت الفنانة دنيا سمير غانم اليوم ضيفة في محطة راديو "إنرجي" مع المذيعة زاهرة رامي والمذيعة منة عامر، تحدثت فيه عن علاقتها بوالديها وزملائها في الوسط الفني وأسباب تركها العمل في مسلسل "الكبير أوي"، ورأيها في تصريحات شيرين الأخيرة.. 

تحدثت دنيا سمير غانم عن مسيرة والدها الراحل في المسرح معبرةً: "أتمنى أن أقدم ربع تاريخ والدي في المسرح وهو اللي حببنا أنا وإيمي في الفن.. كنا بنروح معاه كل خميس وجمعة.. ومن زمان جدًّا مستنية الخطوة دي".

وتابعت كلامها: "بابي كان متضايق إن محدش بيعمل مسرح من المنتجين غير الأستاذ أحمد الإبياري.. كان حلم حياتي أقف قدام والدي على المسرح بس الحمد لله".

عبرت دنيا سمير غانم عن اختلاف طريقة تفكيرها الفني بعد رحيل والدها، وأوضحت حقيقة الخلاف مع هشام جمال قائلة: "بعد التجربة اللي مريت بيها مع والدي ووالدتي حسيت إني بحاجة لتقديم أكتر الأعمال الفنية اللي بتعبر عني".

وردًّا على سؤال خلافها مع المنتج هشام جمال قالت: "أنا مقصدش ده بالمعني الحرفي ولكن كتير من الظروف اللي مريت بيها في حياتي الشخصية ممنحتنيش الفرصة لتقديم كل ما بحلم بيه فنيا".

 

وأشارت إلى أنها بحاجة للتواصل مع والديها من خلال فنها، قائلةً: "بقيت حاسة إني عاوزه فن وإنه ده اللي هيوديني عندهم.. ولما بغني أو بمثل ببقى شيفاهم وببقى حاسة إنهم حاسين بيا".

عبرت دنيا سمير غانم عن طريقة تعامل والديها معها قائلة: "بابي كان مركز معانا طول الوقت في إنك تعملي اللي إنتي عاوزاه.. كان مليان حاجات جميلة خصوصًا في التربية وكان البيست فريند بتاعنا".

وأكملت: "أما مامي كان من أجمل الحاجات اللي بتقولهالنا حسي إن ربنا معاكي أيًّا كان الموقف غلط ولا صح هو اللي هيسندك ويخليكي تمشي صح".

كما دافعت دنيا سمير غانم عن الفنانة شيرين يعد أزمتها الأخيرة قائلة: "شيرين قمر تقول وتعمل اللي هي عاوزاه.. وأنا مستنية أغانيها والصوت ده لازم نحافظ عليه".

ووصفت هشام ماجد بأنه "كوميديان شاطر جدًّا وهو شخص خاص بالنسبة لي وملتزم ومحترم وبيحب شغله أوي.. وبحب وضوحه وصراحته من أحلى الحاجات اللي فيه".

أما عن أسباب تأخر فيلم تسليم أهالي فقالت: "وقفنا التصوير وقت الكورونا كان باقي أسبوعين.. وبعدين اتأجل في العرض بسبب حاجات الإنتاج والتوزيع".

كما كشفت دنيا عن حبها الكبير لمسلسل الكبير وأسباب تركه قائلة: "موضوع الناموس حقيقي جدًّا وأي حد في الكاست هيأكد الكلام ده".

 

وأردفت: "بحب مسلسل الكبير أوي وكنت متضايقة لما مشيت من المسلسل، بس جوايا حاجات تانية كتير جدًّا.. شبابي كان بيدفن تحت الباروكة والجلابية".