الكاتب مصطفى فتحي يوجه نصيحة للصحفيات: تعلمن من حفريات هشام سلام

وجه الصحفي مصطفى فتحي، نصيحة إلى الصحفيات الجديدات في المهنة، بضرورة التعلم من الدكتور هشام سلام، مؤسس مركز جامعة المنصورة للحفريات الفقارية.

وكتب مصطفى فتحي عبر حسابه الشخصي على موقع "فيس بوك"، قائلاً: "الحقيقة الدكتور هشام سلام نموذج مدهش، وكصحفي اتعلمت منه ومن حفرياته حاجات كتير بشكل غير مباشر، الراجل ده قدر يخلي الناس العادية تهتم بعلم الحفريات، اللي هو علم كان بعيد بدرجة كبيرة عن اهتمامات كتير من مستخدمي وسائل التواصل، وده بسبب قدرته على تبسيط كل ما يخص علم الحفريات".

واستكمل حديثه: "وده دور مهم للصحافة، إحنا مطلوب مننا طول الوقت نبسط المعلومات والدراسات والأبحاث العلمية للقراء، نقدم لهم وجبة بتحتوي على مكونات علمية جامدة، لكن بطريقة سهلة الهضم".

واستكمل: "الدكتور هشام سلام بيمارس علم الحفريات بشغف حقيقي، مستحيل تقول عليه موظف، لكن بنقول عليه مبدع! والصحافة لما بنمارسها بشغف، بتكون النتيجة النهائية مدهشة، قصص مؤثرة، عناوين جذابة، صور حلوة، مجهود حقيقي علشان نجمع أكبر قدر من المعلومات ونصيغها بطريقة إبداعية".

وأردف: "سلام بيساعد أجيال جديدة على التحقق والنجاح، وبيرحب باستقبال أطفال نفسهم يتعرفوا أكتر على عالم الحفريات، وده دور عظيم لو قام بيه الصحفي بحب، أعرف زملاء عندهم خبرة كافية، وطول الوقت بيساعدوا طلاب الصحافة، وبيعملوا ورش مجانية، وبينشروا على حساباتهم الشخصية مصادر عظيمة لإفادة أكبر عدد من الزملاء".

واختتم: "وأخيرًا.. هشام سلام مش قاعد في مكتب في مؤسسة حكومية! الراجل طول الوقت "بيتنطط" علشان يكتشف كل جديد. والفرق بين الصحفي اللي قاعد في مكتب تحت التكييف وبين الصحفي اللي بيتحرك تحت الشمس ويسافر ويتعلم".