زوجة تشكو: جوزي عاوز يتجوزني عرفي عشان الجنسية الأمريكية

كتبت المرأة: «السلام عليكم، ممكن لو سمحتوا حد يفيدني، أنا متجوزة وجوزي هيسافر أمريكا، وبيقولي إنه عاوز ياخد الجنسية الأمريكية وعلشان يعمل ده لازم يتجوز هناك وقوانين الدولة هناك تشترط إنه ميكونش متجوز، فهو عاوز يطلقني قبل ما يسافر طلاق إبراء، يعني أبريه من كل حاجه ومش عاوز يديني حاجه ولا حتى المؤخر ولا أي فلوس، وعاوز يتجوزني عرفي». 

وأضافت: «أنا مش عارفة أعمل إيه بصراحة، ومش فاهمة إن كان بيضحك عليا ولا لا، وهل الجواز هناك فعلا بيشترط ميكنش متجوز والجواز العرفي ده حلال ولا حرام، أنا فعلا تايهة ومحتارة، أرجوكم فيدوني بسرعة لأنه مسافر 30-8 لو سمحتم».

علق حازم: «لا اوعى ولو أصر يمضيلك على إيصالات أمانه بحقك ليه تبريه؟؟ اوعى تضيعي حقك وعنه ما سافر رب هنا رب هناك».

وقالت دينا في تعليق: «بيضحك عليكى عشان متاخديش حاجة، متمضيش على أي حاجة ولو عايز يطلقك يروح يطلق ويدفع حقوقك كاملة سواء ودي أو بالمحاكم».

وعلقت عايدة: «بعيد عن الطلاق والعرفي أنتي هترضي يتجوز تاني حتى لو جواز مصلحة؟».

وكتب عاطف تعليق: «لا تستمعي إليه، لا يوجد زوج يعرف قدر زوجته يفرط فيها لأي سبب أو يطلب منها ذلك لأجل هجرة، النصيحة لا توقعي على أي شيء ودخلى أهل حضرتك في الموضوع لأن دى تصرفات غير أمينة ولازم تفهمي إذا كتب ورقة طلاق وقع الطلاق ساعتها عاوز يرد حضرتك دون إثبات الرجعة وقد تنازلتي عن حقوقك لأ لا تقبلي كل هذا العبث من الأساس الله المستعان والله على أزواج بالشكل ده».

وقالت أسماء: «جوزك له مأرب وأهداف أخرى يا ست الستات، عاوز يخلع من غير جيبه ما يتعور وادي دقنى إن شوفتيه تاني بعد ما تعمليله القرص والشريك وحلة المحشي وجوز الحمام والبطاية وتوديه المطار، وتقوليله باي باي يا حتة مني، اوعى تنسى تغسل رجليك وتشرب اللبن قبل ما تنام وطمني عليك باستمرار ياروحي، وهو هيعيط ويقولك وهو بيشحتف حاضر يانن عيني».

وعلقت رنا: «عاوز يتجوز عليكي يسلبك كل حقوقك وبيسرقك عيني عينك يوقف حالك بالجواز العرفي (لا هو اللي متجوزك وقاعد معاكي ولا هو اللي طلقك وسابك تتجوزي غيره) لو فهمك أن الجنسية دي عشان مصلحتكم أنتم الاتنين اشترطي تاخدي حقوقك كاملة قبل الطلاق ولو عاوزك يبقى يرجع لك تاني بعد ما ياخد الجنسية بعقد جديد ومهر جديد (ده لو فضلتي مستنياه أصلا)».

بينما قالت آية: «كل ده ولسه مش فاهمة إنه بيضحك عليكي، ده عملك قرطاس كبير قد الدنيا.. جوزك مش سالك يا مدام».