استنكرت الفنانة فريدة سيف النصر الهجوم الذي يتعرض الفنانون من قبل رواد السوشيال ميديا، وأوضحت أنها لجان مستهدفة للقضاء على الفن المصري. 

"فريدة" عبرت عن ذلك عبر حسابها علي موقع التواصل الاجتماعى "فيسبوك" قائلة: "أنا زعلانة علينا كلنا أوي.. المصريين أحلى وأطيب وأجدع من كده بكتير.. خفة دم وكرم وذوق.. إيه اللي حصل.. ليه بنستخبى ورا شاشات وننزل نحر رقاب بعض؟ الكلمة القاسية بتذبح.. بقينا نكديين ما نعرفش نفرق بين جد وهزار.. كله عايز يتخانق مع كله.. إيه ده؟ وكل يوم يعاملوك بوش أو حسب المصلحة".

وتابعت كلامها: "في إيه؟ بعض الناس ماسكين الفنانين وكأن في تار بلا أسباب.. دي عجِّزت، ودي كرمشت، ودي غيرت دينها، وده دمه تقيل، وده كبر في السن لكن بيغني، وده بيرقص كونغرو، وده اتكسح، ودي روحي موتي كفاية.. ما لكم في إيه بجد.. هما الناس دي ما أسعدكمش أعمالهم فترات من الزمن.. طيب بلاش إنت ما بتحبيش فلان غيرك بيحبه.. في إيه يا جماعة؟".

وأضافت "فريدة": "الفنانين معمرين معظم البيوت المصرية.. تحسوا إن فيه مخطط لهدم الفنانين، القوى الناعمة اللي فاتحين بيوت 14 مليون متخيلين؟ كل المهن شغالة معانا تحت إيديهم كام عامل وأسطى، كل واحد فيهم عنده أهل وزوجة وأطفال، وفي اللي جوز ولاده وعندهم بيوت مفتوحة.. بتحاربوا تمن عدد البلد في أكل عيشهم؟.. اقرؤوا كده المسلسل بيكتب ناس، قد إيه عمالة في العمل شوفوا وقولولي".

واختتمت كلامها موضحةً أن هؤلاء المنتقدين لجان مأجورة لهدم الفن قائلة: "كفاية هد في الفن والوحش انقدوه بأدب والكويس شجعوه.. إنما تهزؤوا فنانين كبار ليه يعني، على فكرة أنا عارفة إنها لجان مستهدفة الفن المصري، والفن عمومًا ما هو العربي بيصب هنا.. هاه قرروا إيه.. هنشتم من ورا الشاشة، ولا هنقول كلام نصح حلو يا باشا؟".