نشرت فتاة على موقع التواصل الاجتماعي "فيس بوك"، خطوبتها بعد فترة  قليلة ممن سبقوها النصيحة حتى تستطيع عبور هذه الفترة بسلام، وكيف تتعامل مع خطيبها وعائلته بشكل مناسب.

وكتبت الفتاة: «عاوزة نصايح لبنت أول مره تتخطب وتتعامل مع خطيبها إزاي ومع أهله إزاي ونصايح عشان أهتم بنفسي واللي عنده أي معلومة يفيدني».

وجاءت التعليقات خفيفة الظل ومختلفة، والنصائح كانت غاية في الأهمية وهي.

قالت روفانا: «متدخليش بعشمك كله مرة واحدة.. خليكي طبيعية.. متصرفيش عزايم وفسح ومكالمات وأحضان وبوس كتير ومترغيش كتير متتدلقيش.. الاهتمام الزايد بيتفهم دلقه مش حب وأصول.. ابعدي حبة تزيدي محبة وتخفي المشاكل وكتر كلام ولو جيتي قصرتي لأي سبب هيتفهم غلط».

وعلقت رحمة: «أولا اللي بينكو مفيش حد تالت يعرفه..

طول ما انتو محافظين على ده هيفرق في علاقتكو جدًّا..

بلاش ندية وعصبية علي أتفه الأمور انتو لسة في الأول وكل واحد بيكتشف طباع التاني طبيعي هتلاقي حاجات كتيرة مش عاجباكي وهو كمان.. لحد ما واحدة واحدة هتلاقوا إن انتو بتبدؤوا تفهموا طباع بعض والتصرف ده كان ليه وكدة.. واتبسطي بالمرحلة دي بكل تفاصيلها ومتتسرعيش في الحكم خدي وقتك وفكري قبل أي كلمة أو تصرف علشان محدش يزعل منك ولا انتي ترجعي تغلطي نفسك».

وقالت رزان: «حبيبتي اسمعي مني ربنا يجازيكِ كل خير ويفرحك ضوابط الخطوبة ضوابط الخطوبة ضوابط الخطوبة.. ربنا حطلنا ضوابط نمشي عليها وللأسف قلة قليلة جدََا جدََا اللي ملتزمة بيها، ابدئي صح عشان حياتك تبقى جميلة بإذن الله وربنا يكتبلك السعادة».

كما علقت شروق: «خليكي على طبيعتك دايمًا وادي كل حاجة حقها لا أكتر ولا أقل، سواء اهتمامًا أو تعاملًا عمومًا».

وقالت صباح: «خلي بالك من العلامات اللي ربنا بيحطها في سكتك إنك تكملي أو تفشكلي اعملي ليه اختبارات ولو بخيل بلاش منه.. عصبي وبيغلط بلاش.. لو بيغلط في أهله أو أهلك بلاش.. وحاجات كتير صلي استخارة كل يوم لحد الفرح».