وكتب كريم: «اتجوزو في بيت عيلة يا جماعة وافتحو البيوت والشبابيك وانزلو اطبخو سوا وكلو سوا ونامو سوا عادي، صاحبي حماتك واعتبريها أمك واصحي الصبح دلعيها وفطريها واضحكو وهزرو، صاحبي إخوات جوزك وحبيهم وقدمي لأولادك عزوة وعيلة، متصدقوش الكلام بتاع المشاكل والفيلم الهندي ده، طول عمرهم زمان كانو عايشين في بيت عيله والبيوت كانت مفتوحة وكلها خير وبركة وحب املوا البيت فرحة باللمة، رجعو لبيوتكم الحب».

ولكن التعليقات كانت بعضها مؤيدة لكلامه والبعض الآخر معارض ويهاجمه لرفضه لما يقول واعتباره كلامًا غير صحيح، وجاءت كالآتي: 

علقت سلمى ساخرة: «اسمعوا كلامه يا جماعة عيشوا في بيت عيله وكل حاجه هتبقي محسوبة عليكي متقدريش تعزمي حد متقدريش تخرجي وتدخلي على كيفك عمر حماتك ما هتحبك أكتر من بنتها، ولا هتقدري تلبسي اللي نفسك فيه، ولو يوم منزلتيش هتبقي اليوم اللي بعده لوي بوز اسمعوا كلامه يا جماعة اسمعوا».

بينما قالت رشا: «دي أحلى حاجة العيلة واللمة الحلوة اللي من ساعة ما راحت الدنيا مبقاش ليها طعم الله يرحم من أسعدونا بحبهم».

وعلقت سلمى: «زمان مين اللي كان خير لا زمان أهلنا ولاد أصول أوووي وعشان منشلش من حماة ماما ولا نشوف إن سلفة ماما وحشه وإخوات بابا عقارب كانوا بيسكتوا لحد ما كبرنا وفهمنا إن ده الطبيعي فبدأوا يتكلموا ويحكوا اللي حصلهم زمان، لكن دلوقتي البنت بقت قادره تتكلم وتاخد حقها لكن الوضع مختلفش خالص الحما هتفضل حما وأخت جوزك مش هتحبك زي أختها، والأحسن البعد عشان نريح راسنا وتبعد عن المشاكل وهما حبايبي من بعيد وحماتي زي مامتي على عيني وعلى راسي وأخت جوزي سكر بس مفيش عيشة لينا سوا، إحنا هنخترع حاجة جديدة معادش فيه حد سوي نفسيا والقرب لازم معاه خناقات ومشاكل وعقول الناس تختلف والراجل الزن على ودانه أمرّ من السحر».

وعلقت ندى: «أنا عن نفسي معنديش مانع خالص أعيش في بيت عيله بس يكون مع الشخص اللي بحبه معنديش مانع خالص أنزل أقعد مع حماتي فيها إيه ما هي مامتي التانية، وأنا طول عمري بخدم أمي فيها إيه لو خدمتها هي كمان؟ أهم حاجة إنها تكون راضية عني وجوزي راضي عني علشان ربنا يرضى عني، وحقيقي بتمني ربنا يحققلي اللي باتمناه ويجعله من نصيبي، ولو حصل هديلهم كلهم عنيا والله ادعولي كتير دعوة 40 غريب مستجابة».

بينما قالت شيماء بسخرية: «والله نفسي أعمل كدة بس معانا عقربة قاعدة ع السقطه واللقطة»، وقالت خديجة: «أسود عيشه والنبي تسكت».

وعلقت أيضاً جومانا محذرة من المنشور: «كوكب زمردة والله إحنا حاولنا كثير نحبهم ما يحبوناااااااش.. خليك بعيد أحسن.. البوست فخ والله».

بسمة: «زمان كان فيه مشاكل عادي بردو والله أنا عن نفسي ألاقي الناس بس اللي تبقى قلبها صافي ومش شايلة جواها حاجة وحشة وتخاف ربنا قبل متفتن أو تعمل غلط وتبقى صافية كدا وأقعد معاهم عادي زي عيلتي لكن مفيش كدا دلوقتي».