بنات الفيسبوك يرفعن شعار «لا لزواج الأقارب».. فتاة تسأل وأخريات يحذرونها!

طرحت إحدى الفتيات مسألة هامة للمناقشة على موقع التواصل الاجتماعي "فيسبوك"، عندما عرضت مشكلتها لتحصل على آراء الفتيات الأخريات، فهي تشعر بالحب تجاه أحد أقاربها الذي يريد الزواج منها وتتساءل هل بالفعل زواج الأقارب غير مريح أم يمكن أن يكون زواجًا سعيدًا.

وكتبت الفتاة في المنشور: «بنات ممكن اللي ليها تجربة انها اتخطبت أو اتجوزت ابن عمها تقولي عيوب ومميزات الموضوع ده هو بيلمح بخطوبة وأنا طول عمري بشوفه أخويا بس كان بيجي وقت أعجب بيه وخلاص مش عارفه اعمل ايه ؟ ايه رايكم».

علقت مريم: «نصيحه بلاش صدقيني بصي الحياه صعبه وطبيعي هيحصل خلافات بينكو وبينه فالأهل هيكون موقفهم حساس جدا وهيضغطو عليكي عشان مايخسروش بعض فنصيحه بجد عن تجربه واقعيه قدامي حقيقي موضوع صعب بس برضو صلي استخاره واوعي تتجاهلي اي اشاره ربنا يبعتهالك وربنا يقدملك الخير».

وقالت تقى في تعليق آخر: «نصيحتى  ليكى بلاش أولا أنهاردة هو ابن عمك وعمك دة حبيبك وزى الفل  بكرة  هايكون حماكى أبو جوزك  مشكلة  لو حصلت العيلة كلها هاتعرف اتصالحتوا وتمام  وزى الفل  النفوس  في الاهل شالت ، الغريب  بكل  قوة تقدرى  تاخدى  حقك منه  لكن القريب  صعب جدا  بحجة  انوا قريب ، انا مش بقول أن خلاص في مشاكل  بس كل بيت  وارد  حاجة  حصلتلك  في بيتك  من خير  ولا شر  كل قرايبك  هايعرفوها  حتى لو حبيتى  تدارى  عليها  وفى مثل بيقول  أبعد حبة  تزداد  محبة».

وقالت غادة: «بصي انتي هتلاقي 90% بيقولك بلاش دا ان مكنش 100  بس حقيقي ديه بتتوقف على الشخص نفسه مش اي حاجه تانيه انا متجوزه ابن عمي ومكنتش اتخيل ان حد يحافظ عليا زيه شخص بيتقي الله فيا وديما عامل اعتبار لانه يعوضني عن عدم وجود عمه اللي هو ولدي الله يرحمه».

وعلقت أمل: «اتجوزيه يا بنتي لو بتحبيه او هو بيحبك وافقى مهما كان وفى عز المشاكل هيبقى احسن من الغريب ميت مرة ابن عمك الوحيد اللى هيقبلك بأي عيوب فيكي وفى اهلك مش هيعترض وهيبقى ستر وغطا عليكي هو بس اللى هيتقبلك ظروفك اي كانت اية بالبنسبة لتجربتي انا ربنا يباركلى فيه ويخلهولى ده جوزي وصاحبي واخويا».

وقالت نور: «متسمعيش كلام الي بيقولولك بلاش انت ادرى بنفسك و عارفه ابن عمك هيحطك فعينيه أو لا صلي استخارة و استشيري حد كبير فالعائلة خدي رأيه ولو حصل انفصال لا قدر الله عادي كل حد هيروح فطريقه هيفضل ابن عمك و هتتكلمو عادي لا العائلة تقطع بعضها و لا حاجه انا كنت مخطوبة لابن عمتي وفشكلت الخطوبة وبنتكلم ونهزر عادي جدا محدش زعلان من حد».

وعلقت نوال: «لو هو كويس وهيتقي ربنا فيكي وانتي عندك قبول من ناحيته جربي مش هتخسري حاجه بس تبقي مفهماه أن الخطوبه فتره تعارف ولو حد فينا مستريحش يبقي كل واحد يشوف حاله ومفيهاش كسوف لازم تحطي النقط علي الحروف معاه قبل اي حاجه وربنا يقدملك اللي فيه الخير ليكي».