أزمة العنوسة وخوف الفتيات من التقدم في العمر دون زواج أصبحت هي أزمة العصر؛ حيث تجبر البنات على الزواج من شخص غير مناسب أو شخص لا تشعر معه بالراحة فقط من أجلها خوفها من اللقاء بدون زواج.

وكشفت إحدى مشاكل الفتيات على موقع التواصل الاجتماعي "فيس بوك" اليوم، أزمة خوف البنات من العنوسة والقبول بالزواج من أي شخص حتى لو غير مناسب.

وكتبت تلك الفتاة في منشور: «لو بحب واحد بتاع بنات وهيتقدملي مع العلم عندي 28 سنة !!! اوافق...عارفين لما تمام بحبه وحسا إني هقدر أستحمل..... حد مر بحاجه زي دي وقدر يستحمل بعد الجواز حاسة إني بحبه جدًّا أو متأثرة بيه أو متعلقة بيه.... وفكرة إني أبقى أم مسيطرة عليا... طيب لو سبته هحب تاني !!! طيب لو اتجوزت واحد مبحبوش هعرف أعيش.... طيب سني مش كبر !!!».

علقت منى: «هو ليه السن بيخوفنا كده وعامل لينا بعبع اشمعنا الرجاله عايشين حياتهم عادي بالطول والعرض، أنا لسه مدخلتش على الـ30 وخايفة من اللي بسمعه، وبشوفه أكن خلاص اللي بيدخل على الـ30 صلاحيته بتنتهي ومش هتنفع تتجوز ولا هتلحق تخلف كفايه ضغط علينا بقا بموضوع السن ده بالله عليكم أنا حاسة إني عايزة أموت قبل الـ30».

وقالت سمر: «مدام بتاع بنات يبقي مش بيحبك وانتي مش ماليه عينه ياحببتي وانتي عشان بتقولي سني كبر وبتاع رغم إنك مش كبيرة بس بعد الجواز هيكبرك بالهم والتعب والمسؤلية لوحدك وهيروح هو برضو يشوف نفسه لأنه متعود على كدة واحد شايف إنه يكلم دي ودي عادي والدنيا حلوة عنده تفتكري دة هيبقي باقي عليكي ولا أصلا هيتقي ربنا فيكي في والأول والآخر انتي حرة بس أديكي شايفة حواليكي الدنيا بقت عاملة إزاي وكل يوم مشاكل من النوعية دي بنشوفها وترجعوا بعد كدة تعيطوا».

وعلقت فاطمة: ما دام بتاع بنات يبقي هيتعبك سيبيه للبنات بتاعته وربنا يرزقك بالأحسن منه واللي يستاهلك بجد ولا كبيره ولا حاجه يا بنتي نصيبك هيجيلك والله في الوقت المناسب».

وقالت نور: «ولما تجيبي عيال ويتمرمطوا معاكي في طلاق ومحاكم وقله صرف وخناقات هيبقي كويس هو يا جماعة انتم ليه بتفكروا في نفسكم بس ليه مش بتفكروا في العيال الي بتجبوها تعذبوها في الدنيا دي ربنا قال: اختاروا دينه وخلقه فين بقي الدين والخلق في راجل بتاع بنات حرام عليكي نفسك وأولادك متبقوش أنانيين كده».

وقالت آية: «بصي تقعدي لوحدك أحسن ما ترتبطي بحد يتعبك نفسيا احنا بنختار الناس المريحه اللي تريحنا نفسيا قبل أي حاجه مش واحد تفضلي شاكة فيه كل الوقت وهو مش هيتغير».

كما علقت رباب: «هتتطلقي علطول لانك مش هتستحملي وانتي أصلا واحدة من الكتير اللي يعرفهم شويه وهيزهق منك وهيفضل ينتقدك ومفيش حاجه اسمها حاسة. فكري بعقلك لأن كل اللي انطلقوا كانو حاسيين بردو أنهم هيستحملو يارب تكون الرساله وصلت».

وقالت سارة: «مفيش راجل مش نسوانجي بس مش هتستحملي لو عديتيها مرة أو اتنين مش هتستحملى تعديها تاني وهتفضل مأثرة عليكي نفسيًّا بس ده مينمعش بردو إنه ممكن يكون عنده قابلية للتغيير».