مصطفى حسني: الشخص دائم الفرحة عنده انفصال عاطفي ومحدش بيشاركه أزماته
تناول الداعية الإسلامي مصطفى حسني، في الحلقة السادسة من برنامجه القناع، الذي يعرض في رمضان 2022، الحديث عن صفات الشخص دائم الفرح، الذي يرسم صورة الفرحة في جميع الأحوال والظروف.
وقال الداعية مصطفى حسني:"إن احتياجاتك المشروعة اللي من حقك تلبيها، لا تتناسب مع قناع شخصية الظل، لأن شخصية الظل جزء من شخصيتك مابتحبهوش وخايف من النسخة دي إنك متعرفش تعيش بيها احتياجات فبتلبس قناع شخصية هي بالظبط عكس شخصية الظل، وانت متصور إنك بالقناع ده هتلبي احتياجاتك، لكن مشكلة القناع ده إنك وانت بتتعامل بيه ناسي ربنا، مرهق لنفسك".
وأضاف:"اللي عايش بقناع دائم الفرحة، خايف يتوجع أو يغضب أحسن يتقال عليه سلبي وسودوي، فأنا فرحان دايمًا ومبسوط دايمًا مهما اتخبطت في الحياة أو حد جه عليا أنا مبسوط، والخوف بيبقى مش دايمًا دافع جيد للتصرف"، وتابع: "محدش بيجيله ويشاركه أزماته، لأن عنده انفصال عاطفي، لما حد بيجي يحكيله أزمته بيخفف منها".
وأوضح الداعية مصطفى حسني: "صاحب قناع دائم الفرحة عنده شيء اسمه "الإجبار على الإيجابية" بيجبر نفسه إنه يقول أنا فرحان يا جماعة، ومن أَضرار الإجبار على الإيجابية، البقاء على العلاقة مع المعتدين"، مضيفا: "في بعض المشاكل محتاجة إن انت متاخدش بالك منها، هتعدي، وفي مشاكل لازم تقف ولو اتوجعت لازم تتوجع وتستشير وتشتكي علشان تاخد النصيحة تتصرف إزاي، وتقف على باب ربنا".
وتابع مصطفى حسني:"إن صاحب قناع دائم الفرحة دايمًا مبسوط ودايمًا فرحان، في أعز وأصعب المحن مفيش أي حاجة هو زي الفل، هو مش مبتسم امتنانًا لربنا وطمأنينة لأقدار الله هو خايف إن لو اتألم أو اشتكى يتساب، لافتا إلى أن صاحب قناع دائم الفرحة عنده احتياج إنه يتواصل مع الناس ويبقى مقبول ومتقدر ومحبوب، لكنه اتراكم عليه في رحلة حياته إن الشخص اللي بيتوجع في الأزمات وبيشتكي لو كان مهموم وبيحزن في وسط المشاكل ده شخص سلبي وسوداوي، جاحد بنعمة ربنا فالناس هتسيبه، لأن الناس مبتحبش الشخص السوداوي".
اقرأ أيضا..