«من يتحمل تكاليف النفاس للزوجة؟!».. مناقشات ساخنة على «فيس بوك»

طرحت إحدى النساء المتزوجات موضوع جديد للنقاش على موقع التواصل الاجتماعي "فيس بوك"، مما جعل الجميع يظهر وجهة نظره ويكشف عن عادات وتقاليد مختلفة لكل عائلة فيما يخص فترة النفاس للمرأة بعد الولادة.

وكتبت تلك المرأة سؤالا على إحدى جروبات النساء على "فيس بوك" قائلة: «هي البنت الوالدة عند أهلها اما تقعد عند أهلها بعد الولاده مين اللي بيشيلها في الأكل والنفاس أهلها ولا جوزها وأهله؟!»، وذلك في إشارة إلى المصروفات التي تحتاج إليها المرأة لشراء الطعام والأدوية والأدوات الخاصة بها بعد الولادة والتي تمثل تكاليف عالية، فهل يتحمل تلك التكاليف الزوج أم أهل الزوجة؟! 

علقت لاميس قائلة: «انا مش متخيله ان جوزي يدخل علينا بفراخ مثلا، عموما هو حسب القدره ممكن لو اهلك مش مقتدرين عليكي معرفش بقي الدنيا بتبقي ايه بس هو الفكره ان كده كده هو لما بيجي زياره بيجيب حاجه بالاخص لو مجيته عزيزه فا برضوا مش داخل طرزان يعني».

وقالت سمية: «على حسب كل مكان احنا عندنا فى الصعيد لازم الزوج يدي لأهل مراته فلوس للنفاس وعلشان مراته وهي راجعه بيتها أهلها بيدولها خزين للبيت وخبيز واكل وكده، ده غير مصاريف البيبي والعلاج لان حرام نتقل ع اهالينا بالذات في الظروف دي».

وعلقت مي: «في الزمن دا والأحوال الاقتصادية هاتى وساعديهم الظروف وحشه على الكل واكيد وراهم مسؤليات تانيه».

وقالت منة: «المفروض الزوجة والزوج بيشيلوا بعض ولو حد من الأسرتين ساعد مفيش مانع لكن مش واجب حد معين».

وعلقت ندى قائلة: «مش منطقي أكون ف بيت اهلي وجوزي يدفع تمن إقامتي بس لو بالذوقيات عادي بتمشي».

وقالت علا: «والله أهلها كتر خيرهم بس مادام ليها راجل يبقي يصرف هو عليها سواء قاعده ف بيتهم او عند اهلها».

بينما نصحت سلمى قائلة: «اهلك بيشيلوكي بس من الاصول زوجك ووالدته بيودولك حجات برضه عند اهلك يجيب فراخ مثلا يجيب حجات تتقدم للناس».

وعلقت شيماء: «حسب العادات عندك في أماكن الأهل هما اللي بيشيلوا بنتهم من الالف للياء وفيه أماكن الزوج بيتكفل بكل حاجه وفي اماكن تانيه الأهل والزوج الاتنين بيشيلوا، بس طبيعي لو ظروف اهلك متيسره مش هيقبلوا ياخدوا حاجة من الزوج وهيتكفلوا بيكي».