الأمهات يروين تجاربهن لترشيد «مصروف الأبناء» أثناء الدراسة

طرحت عبير أحمد مؤسس اتحاد أمهات مصر للنهوض بالتعليم، وائتلاف أولياء أمور المدارس الخاصة، سؤالا للنقاش بين الأمهات من أولياء الأمور، يتضمن: "بتتعاملوا إزاي مع الولاد في المصروف؟ وهل بيحتاجوا يشتروا من الكانتين بتاع المدرسة؟ ولا كل لوازمهم معاهم.. احكولنا علشان نفيد بعض؟".

ولاقى السؤال تفاعلًا من أولياء الأمور على صفحة اتحاد أمهات مصر، عبر موقع التواصل الاجتماعي "الفيسبوك"، فقالت ولية أمر، "بتعمد أعطيهم مصروف على الرغم إن الكانتين مغلق بسبب كورونا لكن بخليهم وأنا معاهم يدخلوا السوبر ماركت ويشتروا بفلوسهم علشان يعتمدوا على نفسهم ويعرفوا مفهوم البيع والشراء خاصة أن الميس عندهم بتعلمهم نفس الفكرة وبتعرفهم فئات الفلوس وإزاي يشتروا ويحسبوا".

وأضافت ولي أمر آخرى، "بيكون معاه الأكل بتاعه وعصير ومياه وفاكهة وساعات حاجة حلوة بس بردو معاه مصروف ونادر أوى لو اشترى حاجة علشان الكانتين زحمة"، واستكملت أخرى: "والله أنا بديها سويت وهي رايحه مع السندوتشات وبديها ٥ جنيه ساعات كتير بترجع بيها وساعات تصرفها".

وذكرت ولي أمر، "أنا بديلهم بس مش كل يوم علشان يعتمدوا على نفسهم في الشراء ويفهموا قيمه الفلوس ويعتمدوا على نفسهم، والأيام التانية بحطلهم كل احتياجاتهم عصير والإسناك بتاعهم"، واستكملت أخرى، "أنا بعطيهم فلوس وهما بيشتروا من السوبر ماركت قبل ما يروحوا المدرسة إللى هما عايزينو وأحيانا بيحوشوا من المصروف أى حاجة حتى لو هيسيب جنيه، والحضانة بجيبلوا إلى هو عايزة من بليل"، "بعمل سندوتشاتهم وبخليهم يشتروا الحاجات قبل ميروحوا المدرسة بس بنتي قالتلي زمايلها بيشتروا من الكانتين قولتلها يوم واحد بس هديلك فلوس وانتي تشتري"، وتضيف أخري: "بديله كل حاجه معاه وبديله المصروف عشان لو احتاج حاجه بس في الغالب بيرجع بيه".".

وقالت ولي أمر، "كل لوازمها معاها وبرضه بتصمم تآخد مصروف تشتري من الكانتين، واضح إن هرمون الشوبينج عند البنات من صغرهم".

وأضافت أخري: "أنا برضو بديهم السندويتشات واللبن ولازم مصروف ٥ جنيه ساعات يصرفهم وكتير بيحطها في حصالتهم"."

وأشارت ولي أمر،"هما بيختاروا حاجاتهم بنفسهم كل يوم من السوبر ماركت، ولكن يوم الخميس كنوع من التغير بديهم فلوس ويشتروا واحنا مجموعة أمهات تعرف بعض عاملين النظام دا كل خميس بس يشتروا ويحسوا بمسئولية شرائهم للشيء.

وأضافت أخرى، "أنا هرد من وجهه نظري كأخصائي، هو مهم جدا هما يقرروا عايزين ايه وفي الغالب بيختاروا كانتين المدرسة اللي هو أغلى من بره وقتها تبدأ تقنعيهم إن لو اشتروا من السوبر ماركت الصبح هيجيبوا حجات أكتر، الجانب التاني مهم انهم ياخدوا فلوس في ايدهم مش حجات تتحط في شنطهم لأن امتلاك الفلوس من سمات الكبار وهما بيحبوا يحسوا الإحساس ده وكمان يتعودوا على التعامل المادي مع الأغراب وكمان بيقي الطفل من انه يمد ايده".