عمر مرموش يتصدر قائمة الأكثر تأثيرًا في الشرق الأوسط
مواصفات شريك حياتك.. هلاقيه في كارفور
الأحد 19/سبتمبر/2021 - 03:47 م
أميرة عبدالفتاح
كل فتاة منذ صغرها تحلم بمواصفات شريك حياتها ومعظم الصفات كانت تتخلص في شخصية الأمير في أفلام الكارتون أو افلام السينما وأنه يمتلك كافة صفات الوسامة والرجولة، ولكن مع التقدم في العمر والتعليم تتغير صفات شريك الحياة عند كل فتاة؛ نظرًا لما قد رأته من صفات عند اختلاطها بالشباب في مجتمع الدراسة أو العمل، وتبدأ معايير الوسامة والجمال تختفي تدريجيًّا وتظهر صفات أخرى، منها الذكاء والاجتهاد والطموح، ويقل مطلب أن الرجل يكون رومانسيًّا بكونه رجلًا قادرًا على تحمل المسئولية، فأصبح كل ما تحلم به الفتاة "رجل" يستطيع أن يهون عليها صعوبة رحلة الحياة، ويكون خير رفيق.
"هير نيوز " قامت بجمع آراء بعض الفتيات من مختلف الأعمار وطبيعة الحياة الاجتماعية والعملية عن "ما مواصفات شريك حياتك؟".
س.محمود : نفسي يكون حنين ويخاف عليا ويحترمني وميكنش شكاك والأهم من كل دا يكون شخص تقي.
ر.كامل : طويل وزنه متوسط مهتم بشكله وجسمه وحنين وطيب ومتفاهم ورومانسي وفرفوش بيحب الخروجات وبيراعي ربنا فيا.
ف.وليد : ملتزم دينيًّا ومتفهم ومتربي وابن ناس وبحترم والدته جدا وميكنش بيئة وميكنش مدخن ولا يكون بيفتي، وبيهتم بالجانب الأسري، حسا إني هلاقيه في كارفور.
ر.هاني : شخص كويس وشكله مقبول وابن ناس وطموح وعرف حياته هتمشي إزاي ومش مهم المظاهر.
أ.جمال : يكون بيحبني ويتقي ربنا في معاملته ليا ويكون طموح ويقدر يتحمل المسئولية ويعرف يشيل بيت ويشيل عني.
ت.محمد : يتقي ربنا فيا وميكنش عصبي ويكون في حب متبادل بينا وميكنش غشيم في التعامل ويكون حنين وطموح ويطور من نفسه.
ه.متولي : بار بأهله وحنين ودمه خفيف ولطيف وبيحب الهزار والخروج ومتفاهم وعنده قدرة على النقاش، مش مهم يكون وسيم أهم حاجة دمه خفيف.
د.طارق : يكون شخص مسئول وعارف هو عايز إيه ومحدد حياته، أنا مش بختار شخص ليا أنا، بختار شخص هيكون أب لأولادي، حنين وميكنش بخيل، إنسان ناضج ويكون صاحب قراره في حياته، ودي صفات لو ماكانتش ظاهرة من البداية صعب تبقى موجودة بعد كده، مهتم بشكله ونظافته الشخصية مش شرط يكون وسيم، ميكنش بخيل عشان البخل مبيكنش بخل مادي فقط ولكن بخل مشاعر.
أ.عمر : يكون شخص ناضج، فرق السن ما يقلش عن 3 سنين متفاهم طموح وبيحب الجو الأسري والتجمعات العائلية، يدعمني في شغلي ودراستي، مايكنش أناني، بيحترم أهله ويقدرهم، يكون واثق من نفسه وواثق فيا، قنوع ومش طماع ويكون شخص أمين.
