بشكل نهائي.. توقف واتساب عن العمل على تلك الهواتف
هل أنتِ شخصية "شبعانة"؟.. نانسي ماهر تجيب
الأربعاء 15/سبتمبر/2021 - 01:10 م
عبدالله أبو الخير
ما زالت نانسي ماهر؛ خبيرة العلاقات الأسرية ومرحلة المراهقة، تتبع نمطها في تحليل الأعمال السينمائية والدرامية، لتقدم لنا نماذج عملية تشرح من خلالها الجوانب النفسية للإنسان.
مسلسل "إلا أنا"
حيث كتبت عن الشخصية "الشبعانة" بالتمثيل على شخصية "عالية" في مسلسل "إلا أنا"، في منشور على صفحتها الشخصية على بموقع فيسبوك.
وكتبت نانسي: "في مسلسل إلا أنا ظهرت شخصية جميلة، شخصية عالية البنت اللي حياتها بسيطة وقلبها بسيط، عايشة بروح الأطفال؛ طيبة ورقيقة ووديعة وشخصيتها مريحة وتدعو للسلام".
شخصية شبعانة
وتابعت: "الشخصية دي أهم صفة فيها إنها شبعانة، شبعانة بحب أب وأم بيحبوها، شبعانة بحنية واهتمام وطيبة ملهاش حدود، فاهمة العلاقات ببساطتها وعمقها في نفس الوقت".
وأشارت إلى موضع إعجابها بالعمل: "الحقيقة عاجبني المرة دي إنهم مش مطلعين صفة منتشرة جدا دلوقتي، وهي الناقمة، مش ناقمة على ظروفها، بتحاول تلاقي حلول لمشاكلها، وحتى لما بتصطدم بوحشية بعض البشر مش بتتأثر".
وأوضحت أن هذه الشخصية تتمكن من إيجاد حلول لمشكلاتها لسببين:
١. إنها باصة لعمق روحاني قدري في الأمور؛ إن ربنا سبحانه بييسرلها الأمور، مؤمنة بعدل وقضاء ربنا، وواثقة في سنده وحمايته ليها.
٢. إنها قوية رغم إن في ناس ممكن تشوف رقتها وهدوءها ضعف، وعارفة حدودها وحقها.
تتجنب الصراعات
وأكملت: "الفكرة بقى إن الشخصيات دي بتتجنب الصراعات، بتبعد عن أي مصادر للخطر أو للشر، لكن لو ما عرفتش تبعد بتتوتر وتتهز شوية بسبب قلة الخبرة، لكن العجيب إن حتى لو اتأذت أو اختارت غلط ربنا سبحانه بيبقى ساندها وبيكشفلها اللي مش شايفاه وكأن قلة خبرتها بتتعوض بقدر ربنا وارشاده وحمايته".
توجيه وإرشاد الأم
وأضافت: "اللي ظاهر في المسلسل إنها ما اتعودتش تشيل تفاصيل مسؤوليات بيتها من وهي صغيرة، بس جوابات الأم الله يرحمها كان فيها توجيه وإرشاد من ناحية تبين أنها مسنودة وإن الأم عارفة الجانب اللي قصرت فيه".
وأكدت أن هذه الشخصية رغم أنها تظهر "متدلعة" إلا أنها "غالبا بتبقى قوية ومحاربة، ولما بتتحط في مسؤولية بتشيل وتواجه لإيمانها بسندها وشبعها، ومع الزمن لما يبقى عندها خبرة الحياة مش بتتلوث، بالعكس بتبقى أحكم وأعقل، وقليل قوي منهم اللي طهارة ونقاوة قلوبهم بتتغير".
