بنات

نانسي ماهر: 5 أنواع للفراق وجعهم أرحم من فقدان نفسك

الأحد 05/سبتمبر/2021 - 06:45 م

عبدالله أبو الخير

فسرت الدكتورة نانسي ماهر خبير العلاقات الأسرية ومرحلة المراهقة، أسباب تجنب الفراق، ومؤكدة أن ألم الفراق "أرحم مليون مرة من استمرار الأذى وفقدان النفس في علاقات سامة"، على حد قولها.

فكتبت "ماهر" على حسابها الشخصي على الفيس بوك: "ليه ناس كتير بتتجنب أو بتأخر الفراق؟، الحقيقة أن الفراق ده ليه وجع وخصوصا لو تم تحت ظروف معينة".

الفراق المفاجئ

الفراق المفاجئ بيخلي عقلنا مش قادر يستوعب، علشان كدة دائرة الحزن اللي بتحصل عند الفقد أول خطواتها الصدمة والإنكار، وكأن عقلنا مجهز للتصرف في وقت الصدمة إنه ينكر علشان نعرف نقف علي رجلنا فترة حتي لو بسيطة، بس طبعا الفراق المفاجئ أشد قسوة من اللي بيمهدله فترة.

الفراق الغير آمن

فكرة إنك تكون مطمن في علاقة وفجأة زي ما قلنا تفك وخصوصا لو كانت العلاقة دي مطمئنة وآمنة لك بتحسس الإنسان وقت الفراق كأنه اتعرى، اتكشف، فجأة، وكل ما كنت مش مدي خوانة ومتأكد أن الشخص مش هيسيبك كل ما حجم الوجع ده زاد.

الاضطرار

وده ممكن يكون قاتل عند ناس كتير، مشكلة كبيرة هي اضطرارك للتعامل مع خيانة الشريك، لأنك ساعتها بتحس إن السجادة اتسحبت من تحت رجلك وإن اللي خانك قطع كتير جواك، وأحيانا بتبقى مضطر تفارقه ومش قادر لسبب او لآخر، فالفراق الاضطراري ليه وجع تقيل جدا؛ ما بين الحيرة والغضب والحزن.

التطورات

اللي بتحصل ساعة الفراق دي قصة لوحدها وخصوصا لو الموضوع فيه إهانة، ظلم، أو تدخل أطراف تانية أو مطاردة أو هروب أو إهمال، كل دي أحداث غالبا بتخلي الفراق بيوجع أكتر .

الجراح

الفراق بيسيب جراح عميقة وأسئلة كتير ملهاش إجابات، انهيارات وخذلان من ردود فعل المقربين فقدان الثقة بالنفس وتساؤلات حول المعتقدات والثوابت اللي كتير منها بيتهز في مواقف الظلم والقهر والمعاناة.

وأنهت: "وجع الفراق مش بس بيخلي الإنسان ينسى الحلو أحيانا بيخليه ينسى شكله، ملامحه ويخاف من المستقبل، لكن الحقيقة وجع الفراق أرحم مليون مرة من استمرار الأذى، وفقدان النفس في علاقات سامة".

اقرأ أيضًا..